Լավրովը մեկնել է Թուրքիա

ՌԴ արտգործնախարար Սերգեյ Լավրովն այցելել է Թուրքիա, որտեղ հանդիպում է ունենալու իր թուրք գործընկեր Հաքան Ֆիդանի և Թուրքիայի նախագահ Ռեջեփ Թայիփ Էրդողանի հետ։ Փետրվարի 23-ին Թուրքիայի պետական Anadolu-ն, հղում անելով դիվանագիտական աղբյուրներին, գրել է, որ Ֆիդանի հետ հանդիպման ընթացքում քննարկվելու են երկկողմ համագործակցության հարցերը, հատկապես՝ առևտրի, էներգետիկայի և զբոսաշրջության ոլորտներում։ Մտքեր են փոխանակելու դիվանագիտական ջանքերի միջոցով Ուկրաինայի պատերազմի՝ արդար և կայուն խաղաղությամբ դադարեցման վերաբերյալ։ Քննարկվելու են նաև ԱՄՆ-ի և Ռուսաստանի միջև վերջին շփումները, ինչպես նաև Թուրքիայի հնարավոր ներդրումը գործընթացում։ Ընդծվելու է, որ Թուրքիան, որը 2022 թ․-ի մարտին հյուրընկալել էր Ռուսաստանի և Ուկրաինայի միջև ուղիղ բանակցությունները, պատրաստ է առաջիկա օրերին ևս ստանձնել այս դերը։

Ակնկալվում է, որ հանդիպման ընթացքում քննարկվելու են նաև տարածաշրջանային և միջազգային հարցեր, այդ թվում՝ Սիրիան և Մերձավոր Արևելքը։

Հիշեցնենք, որ Լավրովը Թուրքիա իր վերջին այցն իրականացրել էր 2024 թ․-ի հոկտեմբերի 18-ին՝ «3+3» տարածաշրջանային համագործակցության հարթակի հանդիպման շրջանակում։ Ֆիդանը վերջին անգամ Լավրովի հետ հանդիպել էր փետրվարի 20-ին՝ G20 արտգործնախարարների հանդիպման ընթացքում։