Վրաստանի կառավարությունը ներկայումս ՄԱԿ-ում Ուկրաինայի վերաբերյալ ամերիկյան բանաձևի նախագծի միակ համահեղինակն (համահովանավոր) է, գրում է The Wall Street Journal-ը։
Բանաձևի նախագիծը, որը բաղկացած է երեք կետից, կոչ է անում շուտափույթ դադարեցնել հակամարտությունը՝ Ռուսաստանի և Ուկրաինայի միջև կայուն խաղաղություն հաստատելու համար, ցավ է հայտնում «ռուս-ուկրաինական հակամարտության» ընթացքում մարդկային զոհերի համար և ընդգծում է, որ «ՄԱԿ-ի առաջնային նպատակը միջազգային խաղաղության և անվտանգության պահպանումն է ու վեճերի խաղաղ կարգավորումը»։
«(Փաստաթուղթը) ունի մեկ համահեղինակ՝ Վրաստանի կառավարությունը, որի հարաբերությունները Մոսկվայի հետ վերջերս ջերմացել են»,-նշում է The Wall Street Journal-ը:
Ամերիկյան բանաձևը չի հստակեցնում, թե ով է սկսել պատերազմը և կոնկրետ պահանջներ չի պարունակում Կրեմլի նկատմամբ։ Մասնավորապես, չկա արտահայտություն, որ Ռուսաստանը պետք է ամբողջությամբ և անվերապահորեն դուրս բերի իր բոլոր ռազմական ուժերը Ուկրաինայի տարածքից՝ միջազգայնորեն ճանաչված սահմաններով։
Ավելի վաղ The Washington Post-ը հայտնել էր, որ Վաշինգտոնի վարչակազմը Կիևից պահանջել է հետ կանչել ՄԱԿ-ի Գլխավոր ասամբլեայի իր բանաձևը, որը դատապարտում է Ռուսաստանին և մեղադրում հակամարտությունը սկսելու մեջ։ Կիևը հրաժարվել է հետ կանչել իր որոշման նախագիծը։ Ինչպես նշում է թերթը, 193 երկրներից ավելի քան 100-ը պաշտպանում են բանաձևի ուկրաինական տարբերակը։
ՄԱԿ-ի բանաձևը նախատեսվում է ընդունել մինչև փետրվարի 24-ը, երբ լրանում է պատերազմի երրորդ տարելիցը։
Նշենք, որ «Վրացական երազանքի» կառավարությունը դեռևս որևէ մեկնաբանություն չի արել։
Հետևեք մեզ տելեգրամում
