Մարտի 18-ին կայացել է ԱՄՆ և Ռուսաստանի Դաշնության նախագահներ Դոնալդ Թրամփի ու Վլադիմիր Պուտինի հեռախոսազրույցը։ Սա երկու երկրների ղեկավարների երկրորդ զրույցն է այն բանից հետո, երբ Թրամփը ստանձնեց ԱՄՆ նախագահի պաշտոնը և սկսեց իրագործել Ուկրաինայում պատերազմին վերջ տալու իր ծրագիրը։
Ըստ Կրեմլի՝ Պուտինն ու Թրամփը հեռախոսով «շարունակել են մտքերի մանրամասն և անկեղծ փոխանակումը Ուկրաինայի շուրջ ստեղծված իրավիճակի վերաբերյալ» և հաստատել իրենց մտադրությունը՝ շարունակել ջանքերը հակամարտության կարգավորման ուղղությամբ։
Պուտինը Թրամփին հայտնել է իր պատրաստակամության մասին՝ համատեղ մշակել Ուկրաինայում իրավիճակի կարգավորման ուղիները, ինչպես նաև աջակցել է ԱՄՆ նախագահի՝ Ռուսաստանի և Ուկրաինայի կողմից էներգետիկ ենթակառուցվածքներին հարվածելուց 30-օրյա փոխադարձ հրաժարվելու գաղափարը։ Պուտինը նաև ասել է, որ մարտի 19-ին տեղի կունենա 175-ը 175-ի դիմաց գերիների փոխանակում։
Կրեմլի հայտարարության մեջ նաև ասվում է, որ կողմերը համաձայնել են «շարունակել ջանքերը ուկրաինական կարգավորման հասնելու համար» և այդ նպատակով ստեղծելու են ռուսական և ամերիկյան փորձագիտական խմբեր։
Սպիտակ տան տարածած հայտարարության մեջ նշվել է, որ զրուցակիցները պայմանավորվել են, որ «դեպի խաղաղություն ճանապարհը կսկսվի էներգետիկայի և ենթակառուցվածքների ոլորտներում հրադադարով, ինչպես նաև Սև ծովում ծովում հրադադարի, ամբողջական զինադադարի և մշտական խաղաղության վերաբերյալ տեխնիկական բանակցություններով։ Այս բանակցությունները անմիջապես կսկսվեն Մերձավոր Արեւելքում»:
Թրամփն ու Պուտինը քննարկել են նաև «ռազմավարական զենքի տարածումը դադարեցնելու անհրաժեշտությունը», Մերձավոր Արևելքը որպես ապագա հակամարտությունները կանխելու պոտենցիալ համագործակցության տարածաշրջան դիտարկելը, ինչպես նաև Իրանը, որը ի վիճակի չպտի լինի ոչնչացնել Իսրայելը։
Հետևեք մեզ տելեգրամում
