Գերմանիայի նախագահի աշխատակազմը ներողություն է խնդրել ադրբեջանական կողմից՝ Ֆրանկ-Վալտեր Շտայնմայերը պաշտոնական սոցիալական ցանցերում Արցախի դրոշը տեղադրելու և կից հրապարակման կապակցությամբ։
Գերմանիայի նախագահի աշխատակազմի ղեկավար, Դաշնային Հանրապետության պետքարտուղար Դյորտե Դինգերի՝ Ադրբեջանի նախագահի օգնական Հիքմեթ Հաջիևին ուղղված նամակում գրված է.
«Դաշնային նախագահի սոցցանցերում կարճ ժամանակով հրապարակվել է դրոշի սխալ պատկերը և դրան կից տեքստը, որը վերաբերում է Ադրբեջանի շրջաններից մեկին։ Սխալը հայտնաբերելուց հետո համապատասխան հրապարակումն անմիջապես հեռացվել է։
Գրառումը հրապարակվել է տեխնիկական սխալի արդյունքում և որևէ առնչություն չունի Ադրբեջանի տարածքային ամբողջականության վերաբերյալ Գերմանիայի հայտնի դիրքորոշման հետ:
Ես շատ եմ ցավում տեղի ունեցած սխալի համար և ցանկանում եմ իմ անկեղծ ներողություն խնդրել այն սխալ տպավորության համար, որը վերը նշված հրապարակումը ստեղծել է Ադրբեջանում որոշ մարդկանց մոտ:
Դաշնային նախագահի առաջիկա այցը նպատակ ունի ամրապնդել ադրբեջանա-գերմանական գործընկերությունը և աջակցել տարածաշրջանում ընթացող խաղաղ գործընթացին»:
Հիշեցնենք, որ նախօրեին Երևան կատարած այցի ժամանակ Գերմանիայի նախագահ Ֆրանկ-Վալտեր Շտայնմայերը սոցցանցի իր էջում հրապարակել է Արցախի դրոշը և կից գրությամբ նշել. «Հակամարտությունը Լեռնային Ղարաբաղի շուրջ է։ Այն միջազգային իրավունքով պատկանում է Ադրբեջանին, բայց այնտեղ հիմնականում հայեր են ապրել։ Վերջին տասնամյակներին բազմիցս զինված բախումներ են եղել»:
Հետևեք մեզ տելեգրամում
