«Վրաստանը ողջունում է Ադրբեջանի և Հայաստանի միջև խաղաղության համաձայնագրի բոլոր կետերի շուրջ բանակցային գործընթացի ավարտը։ Սա, անկասկած, առաջընթաց քայլ է տարածաշրջանի ներուժի և կարողությունների ցուցադրման և օգտագործման գործում»,-Ադրբեջանի նախագահ Իլհամ Ալիևի հետ համատեղ ասուլիսում հայտարարել է Վրաստանի նախագահ Միխեիլ Ղավելաշվիլին։
«Մենք հույս ունենք, որ մոտ ապագայում կստորագրվի պատմական համաձայնագիր, որը կարևոր խթան կհանդիսանա տարածաշրջանում երկարաժամկետ և կայուն խաղաղություն ապահովելու համար։ Եվս մեկ անգամ ցանկանում եմ ընդգծել Վրաստանի հռչակած խաղաղության քաղաքականությունը և տարածաշրջանում խաղաղության ապահովմանը նպաստելու պատրաստակամությունը։ Ուզում եմ վստահեցնել ձեզ, որ Վրաստանը միշտ եղել է երկխոսության, դիվանագիտության և խաղաղ համակեցության կողմնակից Հարավային Կովկասում, և այս ուղղությունը կպահպանվի նաև ապագայում»,- հայտարարել է Վրաստանի նախագահը։
Միխեիլ Ղավելաշվիլին նշել է նաև, որ Վրաստանն ու Ադրբեջանը վճռականորեն աջակցում են միմյանց ինքնիշխանությանը և տարածքային ամբողջականությանը։
«Վրաստանը միշտ եղել է Ադրբեջանի տարածքային ամբողջականության և ինքնիշխանության ամուր կողմնակիցը»,-եզրափակել է Վրաստանի նախագահը։
Հետևեք մեզ տելեգրամում
