Վլադիմիր Զելենսկին Ստամբուլում կհանդիպի միայն Վլադիմիր Պուտինի հետ: Այս մասին ասել է Ուկրաինայի նախագահի գրասենյակի խորհրդական Միխայիլ Պոդոլյակը The Breakfast Show-ի եթերում։ Հարցին, թե հնարավո՞ր է, որ Զելենսկին հանդիպի Ռուսաստանի այլ ներկայացուցիչների, օրինակ՝ Պուտինի օգնական Վլադիմիր Մեդինսկու հետ, Պոդոլյակը պատասխանել է. «Իհարկե ոչ»։
«Միայն Պուտինը կարող է որոշում կայացնել պատերազմը շարունակելու կամ դադարեցնելու մասին»,- ասել է Պոդոլյակը։ Նրա կարծիքով, ցանկացած այլ ձևաչափով հանդիպում անիմաստ է և կբերի միայն ժամանակ կորցնելու։
Հիշեցնենք՝ Ռուսաստանն առաջարկել է Ուկրաինային առանց նախապայմանների ուղիղ բանակցություններ վարել Ստամբուլում մայիսի 15-ին:Վլադիմիր Պուտինը հայտարարել է, որ Մոսկվան պատրաստ է երկխոսության և սպասում է Կիևի և նրա արևմտյան գործընկերների արձագանքին։
Ռուսաստանը պետք է մայիսի 12-ից հաստատի լիարժեք, տևական և հուսալի 30-օրյա զինադադար, միայն դրանից հետո Ուկրաինան պատրաստ կլինի բանակցություններին, ասել է Վլադիմիր Զելենսկին՝ ի պատասխան Կրեմլի առաջարկի։
Ռուսաստանի նախագահի մամուլի քարտուղար Դմիտրի Պեսկովը չի նշել պատվիրակության կազմը, որը Մոսկվայից կմեկնի Թուրքիա՝ բանակցությունների։ Ռուս-ուկրաինական բանակցությունները նախատեսված են մայիսի 15-ին, ՌԴ նախագահի գրասենյակը դեռևս չի հայտնել Պուտինի՝ Ստամբուլ ուղևորվելու մասին:
Հետևեք մեզ տելեգրամում
