Վրաստանի առաջին փոխվարչապետ, էկոնոմիկայի և կայուն զարգացման նախարար Լևան Դավիթաշվիլին Euronews-ին տված հարցազրույցում հայտարարել է, որ թեև Վրաստանի` Եվրամիությանն անդամակցության գործընթացի շուրջ շատ են շահարկումները, բայց իրենց քաղաքականության մեջ իրական փոփոխություններ չեն եղել:
«Մենք ունենք միասնական քաղաքականություն, որը հիմնված է կառավարության կողմից պաշտոնապես հաստատված ինտեգրման օրակարգի վրա։ Բոլոր պետական հաստատությունները, նախարարությունները և գործակալությունները աշխատում են դրա իրականացման ուղղությամբ»,- ասել է Դավիթաշվիլին։
Նրա խոսքով՝ Վրաստանի էկոնոմիկայի և կայուն զարգացման նախարարությունը համակարգում է Խորը և համապարփակ ազատ առևտրի գոտու (DCFTA) համաձայնագրի օրակարգի իրականացումը, որը ընդգրկում է ոլորտների լայն շրջանակ։
«Մենք արդեն կատարել ենք պահանջների գրեթե 60%-ը։ Մենք ակտիվորեն իրականացնում ենք կարևոր բարեփոխումներ տնտեսության և դրա տարբեր ոլորտներում, այդ թվում՝ տրանսպորտի, էներգետիկայի, առևտրի։ Սա առաջնահերթ օրակարգ է, և այն մնում է մեր ուշադրության կենտրոնում։ Մենք լիովին կենտրոնացած ենք Խորը և համապարփակ ազատ առևտրի գոտու իրականացման և ինտեգրման քաղաքականության վրա։ Մենք հստակորեն հայտարարել ենք, որ մեր նպատակը մինչև 2030թ․ ԵՄ լիիրավ անդամակցությունն է։ Մենք հասկանում ենք, որ սա երկար գործընթաց է, բայց լիովին հանձնառու ենք այս կարևոր բարեփոխումների իրականացմանը»,- շեշտել է Վրաստանի առաջին փոխվարչապետը։
Հետևեք մեզ տելեգրամում
