Եմենի հութիների հրթիռային ուժերը ռազմական գործողություն են իրականացրել՝ թիրախավորելով Իսրայելի «Բեն Գուրիոն» օդանավակայանը։ «Արմենպրես»-ի փոխանցմամբ՝ այս մասին հայտնում է հութիներին պատկանող Al Masirah հեռուստաալիքը։
Հութիների հայտարարության համաձայն՝ գործողությունը հասել է իր նպատակին՝ բազմաթիվ մարդկանց ստիպելով փախչել ապաստարաններ և դադարեցնելով թռիչքներն օդանավակայանում։
Հութիները մայիսի 29-ին հրապարակված հայտարարության մեջ կրկին աջակցություն են հայտնել Պաղեստինին և նշել, որ կշարունակեն արգելք հանդիսանալ Իսրայելից և դեպի Իսրայել թռիչքների համար։
Իսրայելի պաշտպանության բանակի (ԻՊԲ) հաղորդագրության համաձայն՝ Իսրայելի մի քանի շրջաններում օդային օդային տագնապի ազդանշաններ են հնչել, Եմենից արձակված հրթիռը կալանվել է։
Իսրայելի «12-րդ ալիքն» իր հերթին հաղորդել է, որ Թել Ավիվի մոտ գտնվող «Բեն Գուրիոն» օդանավակայանի աշխատանքը ժամանակավորապես դադարեցվել է Եմենից արձակված հրթիռի պատճառով։
Ավելի վաղ տեղեկություններ էին ստացվել, որ Իսրայելը 4 ավիահարված է հասցրել Սանայի միջազգային օդանավակայանին՝ ոչնչացնելով Yemenia Airlines-ին պատկանող միակ քաղաքացիական ինքնաթիռը: Նախորդ ավիահարվածների ժամանակ ոչնչացվել էր ութ ինքնաթիռ, այդ թվում՝ Yemenia Airlines-ի հինգ ինքնաթիռ:
Հետևեք մեզ տելեգրամում
