Իսրայելի Ազգային անվտանգության խորհրդի (ԱԱԽ) ղեկավար Ցախի Հանեգբին խոստովանել է, որ անձամբ ներգրավված է Սիրիայի հետ ուղիղ բանակցություններում: Այս մասին հաղորդում է «Իսրայել Հայոմ» թերթը։
Ըստ թերթի՝ Հանեգբին այս հայտարարությունն արել է հունիսի 22-ին՝ արտաքին գործերի և պաշտպանության խորհրդարանական հանձնաժողովի փակ նիստում: Այնտեղ նա նաև հայտարարել է, որ Սիրիան, Լիբանանի հետ միասին, այսպես կոչված «Աբրահամի համաձայնագրերի» շրջանակներում Իսրայելի հետ «հարաբերությունները կարգավորելու թեկնածուներ» են:
«Իսրայելի և Սիրիայի ռեժիմի միջև բոլոր մակարդակներում ուղիղ ամենօրյա երկխոսություն է ընթանում: Ես այն վարում եմ այնտեղ սիրիացի պաշտոնյաների հետ»,-Հանեգբիի խոսքերն է մեջբերում թերթը: ԱԱԽ ղեկավարի խոսքով՝ «Իսրայելը և Սիրիան շատ ընդհանրություններ ունեն»։
Ըստ «Իսրայել Հայոմ»-ի՝ հանդիպման մասնակիցներից մեկը հարցրել է Հանեգբիին, թե արդյոք Իսրայելը պատրաստ կլինի դուրս բերել զորքերը Գոլանի բարձունքների բուֆերային գոտուց, եթե Դամասկոսի հետ հարաբերությունները սկսեն բարելավվել։
«Եթե կարգավորում տեղի ունենա, մենք կքննարկենք այս հնարավորությունը»,-պատասխանել է Ազգային անվտանգության ծառայության ղեկավարը։
Հետևեք մեզ տելեգրամում
