Թուրքիայի արտգործնախարար Ֆիդանն ու ՌԴ արտգործնախարար Լավրովը հանդիպում կունենան

Թուրքիայի արտաքին գործերի նախարար Հաքան Ֆիդանը նախատեսում է բանակցություններ վարել Ռուսաստանի արտաքին գործերի նախարար Սերգեյ Լավրովի և ՄԱԿ-ի գլխավոր քարտուղար Անտոնիո Գուտերեշի հետ Ռիո դե Ժանեյրոյում կայանալիք BRICS-ի 17-րդ գագաթնաժողովի շրջանակներում։ Այս մասին հաղորդում է ՏԱՍՍ-ը՝ հղում անելով Թուրքիայի արտաքին գործերի նախարարության աղբյուրին։

«Ֆիդանի նախատեսված երկկողմ հանդիպումների թվում են նաև Ռուսաստանի արտաքին գործերի նախարար Սերգեյ Լավրովի, ՄԱԿ-ի գլխավոր քարտուղար Անտոնիո Գուտերեշի և Ղազախստանի փոխվարչապետ և արտաքին գործերի նախարար Մուրատ Նուրտլեուի հետ», – գործակալությունը մեջբերում է աղբյուրի խոսքերը։

BRICS-ի 17-րդ գագաթնաժողովը տեղի է ունենում Բրազիլիայի Ռիո դե Ժանեյրո քաղաքում՝ հուլիսի 6-ին և 7-ին։ Ռուսական պատվիրակությունը գլխավորում է Սերգեյ Լավրովը։ Միջոցառմանը հեռավար մասնակցում է նախագահ Վլադիմիր Պուտինը։

BRICS-ի հաջորդ գագաթնաժողովը տեղի կունենա Հնդկաստանում՝ 2026 թվականին։ Միջոցառումը կնախագահի Հնդկաստանը։