Ռուբիոն անխոհեմ է անվանել Պաղեստինը ճանաչելու Մակրոնի որոշումը

ԱՄՆ պետքարտուղար Մարկո Ռուբիոն հայտարարել է, որ Միացյալ Նահանգները չի աջակցել Ֆրանսիայի` Պաղեստին պետությունը ճանաչելու մտադրությունը։

«Միացյալ Նահանգները կտրականապես մերժում է Մակրոնի՝ ՄԱԿ-ի Գլխավոր ասամբլեայում Պաղեստին պետությունը ճանաչելու ծրագիրը»,-X-ում գրել է Ռուբիոն։

Պետքարտուղարը Փարիզի որոշումն անվանել է անխոհեմ՝ հավելելով, որ այն «միայն ծառայում է «ՀԱՄԱՍ»-ի քարոզչությանը» և «ապտակ է հոկտեմբերի 7-ի զոհերի դեմքին (խմբ․` 2023թ. հոկտեմբերին «ՀԱՄԱՍ»-ը հարձակվեց Իսրայելի վրա)»։

Հուլիսի 24-ի երեկոյան Մակրոնը հայտարարեց, որ սեպտեմբերին կայանալիք ՄԱԿ-ի Գլխավոր ասամբլեայի նստաշրջանում Ֆրանսիան պաշտոնապես կճանաչի Պաղեստինի պետականությունը։ Նրա կարծիքով՝ «այժմ ամենակարևորն այն է, որ Գազայում պատերազմը անհապաղ դադարի ու քաղաքացիական բնակչությանն օգնություն ցուցաբերվի»։ Մակրոնը նաև կոչ է արել ապառազմականացնել պաղեստինյան «ՀԱՄԱՍ» շարժումը, ապահովել անվտանգությունը և վերականգնել Գազայի իրադրությունը։