Իրանի ԱԳՆ խոսնակ Էսմայիլ Բաղաեին մամուլի ասուլիսի ընթացքում, անդրադառնալով Հարավային Կովկասում տեղի ունեցող զարգացումների և Իրանի դիրքորոշման փոփոխության վերաբերյալ շրջանառվող հաղորդումներին, նշել է, որ Իրանի դիրքորոշման մեջ որևէ փոփոխություն տեղի չի ունեցել։
«Ոչ, մեր դիրքորոշման մեջ որևէ փոփոխություն տեղի չի ունեցել։ Կան երկու կարևոր հարցեր. առաջինը՝ խաղաղություն և Հայաստանի ու Ադրբեջանի միջև հակասությունների կարգավորում, որին մենք աջակցում ենք և կողմ ենք խաղաղության համաձայնագրի ստորագրման գործընթացի արագացմանը։ Մենք խրախուսում ենք երկու երկրներին շարունակել այս գործընթացը։ Ինչ վերաբերում է տարանցիկ ուղիներին՝ մենք միշտ աջակցել ենք հաղորդակցման ուղիների զարգացմանը՝ որպես տնտեսական զարգացման կարևոր բաղադրիչ։ Մենք կողմ ենք այս գործընթացին, բայց մի բան հստակ նշել ենք՝ այդ զարգացումները չպետք է հանգեցնեն տարածաշրջանի աշխարհաքաղաքական կառուցվածքի փոփոխությանը։ Մեկ այլ կարևոր հանգամանք է արտատարածաշրջանային խաղացողների ներգրավման հարցը, ինչը մենք նպաստավոր չենք համարում տարածաշրջանի զարգացման և անվտանգության համար։ Այս հարցի շուրջ ընդհանուր պատկերացում գոյություն ունի։ Որոշ տեղեկություններ՝ կապված այդպիսի կողմերի մասնակցության հետ, արդեն իսկ հերքվել են առնչվող դերակատարների կողմից»։
Ինչ վերաբերում է «Զանգեզուրի միջանցքի» գործարկման լուրերին՝ Բաղաեին նշել է.
«Նախ՝ այն, ինչ քննարկվում է, կապ չունի իրական գործընթացների հետ, քանի որ ներգրավված երկրները դա արդեն իսկ հերքել են, և դրանք ընդամենը լրատվամիջոցների հրապարակումներ են։ Բայց նույնիսկ անկախ այդ տեղեկություններից՝ երրորդ կողմերի միջամտությունը լիովին աննպաստ է տարածաշրջանի համար։ Մենք համոզված ենք, որ տարածաշրջանի խնդիրները պետք է լուծվեն հենց տարածաշրջանի երկրների կողմից»։
Հետևեք մեզ տելեգրամում
