Ռուս խաղաղապահների կողմից «Ադրբեջանի տարածքներում» (Արցախի մայրաքաղաք Ստեփանակերտում) ադրբեջանական կողմի թույլտվության բացակայության դեպքում հայազգի նկարիչ Հովհաննես Այվազովսկու կիսանդրու տեղադրումը անօրինական էր, դա Ռուսաստանի կողմից Ադրբեջանի Հանրապետության ինքնիշխանության նկատմամբ անհարգալից վերաբերմունքի դրսևորում է։ Այս մասին հայտարարել է Ադրբեջանի ԱԳՆ պաշտոնական ներկայացուցիչ Այխան Հաջիզադեն՝ ի պատասխան Ռուսաստանի նախագահի հատուկ ներկայացուցիչ Միխայիլ Շվիդկոյի՝ Այվազովսկու կիսանդրու ապամոնտաժման հարցի վերաբերյալ հայտարարության և TASS լրատվական գործակալության կողմից Ստեփանակերտ տեղանունն օգտագործելու կապակցությամբ։
Արտաքին գործերի նախարարության ներկայացուցչի խոսքով՝ ««Ադրբեջանի տարածքների օկուպացիայի» ժամանակահատվածում անօրինական կերպով տեղադրված նմանատիպ հուշարձանների ապամոնտաժումը տրամաբանական է, ճիշտ և օրինական»։
Ադրբեջանը նաև անհարգալից ու վիրավորական է համարում պետական պաշտոնական TASS գործակալության կողմից «Խանքենդի» քաղաքը Ստեփանակերտ անվանելու փաստը և ակնկալում է ներողություն ու «ուղղումներ», հակառակ դեպքում կձեռնարկվեն համապատասխան միջոցներ՝ կապված գործակալության գործունեության հետ։
«Եթե նման դեպքերը կրկնվեն, փոխադարձության սկզբունքի հիման վրա դա կարող է հանգեցնել նրան, որ ադրբեջանական կողմը նույնպես Ռուսաստանի տարածքում գտնվող բազմաթիվ բնակավայրեր կանվանակոչի իրենց սկզբնական անուններով»,-նշել է Հաջիզադեն։
Հետևեք մեզ տելեգրամում
