Վարչապետ Նիկոլ Փաշինյանի խոսքով՝ Ադրբեջանի կողմից օկուպացված ՀՀ տարածքների խնդիրը լուծում կստանա հայ-ադրբեջանական սահմանազատման հանձնաժողովների համատեղ աշխատանքի արդյունքում և Ալմա Աթայի հռչակագրի հիման վրա։
Այս մասին Նիկոլ Փաշինյանն ասաց լրագրողների հետ ճեպազրույցում։
«Օկուպացված տարածքների խնդիր ունենք ինչպես մենք, այնպես էլ՝ Ադրբեջանը։ Առավել ևս այս խաղաղության պայմաններում՝ այդ հարցերը կլուծենք փոխադարձաբար, համաձայնության մթնոլորտում, արդեն իսկ սահմանված, ստորագրված, վավերացված սահմանազատման հանձնաժողովների համատեղ աշխատանքի կանոնակարգի և Ալմա Աթայի հռչակագրի հիման վրա»,-նշեց ՀՀ վարչապետը։
Հայաստանի և Ադրբեջանի միջև նախաստորագրված խաղաղության համաձայնագրի 1-ին հոդվածում, մասնավորապես, նշվում է. «Հաստատելով, որ նախկին ԽՍՀՄ Խորհրդային Սոցիալիստական Հանրապետությունների միջև սահմանները դարձել են համապատասխան անկախ պետությունների միջազգային սահմանները և որպես այդպիսին ճանաչվել են միջազգային հանրության կողմից՝ Կողմերը ճանաչում են և կհարգեն միմյանց ինքնիշխանությունը, տարածքային ամբողջականությունը, միջազգային սահմանների անձեռնմխելիությունը և քաղաքական անկախությունը»։
Վարչապետ Նիկոլ Փաշինյանը օգոստոսի 18-ին ժողովրդին հղած ուղերձում, անդրադառնալով Ադրբեջանի կողմից Հայաստանի օկուպացված տարածքների խնդրին՝ նշել էր, որ ինչպես Ադրբեջանի վերահսկողության տակ կան Հայաստանի ինքնիշխան տարածքներ, այնպես էլ կան Ադրբեջանի տարածքներ, որոնք գտնվում են Հայաստանի վերահսկողության տակ։ Վարչապետն ասել էր, որ այդ խնդիրը լուծվելու է սահմանազատման միջոցով, իսկ եթե առաջանա որոշ տարածքների փոխանակման հարց, այդ դեպքում ՀՀ իշխանությունները պետք է հանրաքվե անցկացնեն՝ հասկանալու համար, թե արդյոք ժողովուրդը կողմ է նման տարբերակին։
Հայաստանի իշխանությունները հայտարարել են, որ Ադրբեջանը շարունակում է օկուպացված պահել ավելի քան 200 քառակուսի կիլոմետր ՀՀ տարածք։
Հետևեք մեզ տելեգրամում
