Սեպտեմբերի 7-ին Վանա լճում գտնվող Աղթամար կղզու Սուրբ Խաչ եկեղեցում կմատուցվի հերթական՝ 13-րդ պատարագը։ Կազմակերպիչների հաղորդմամբ՝ նախապատրաստական աշխատանքներն արդեն ընթացքի մեջ են։ Արարողությանը ներկա են լինելու բարձրաստիճան հայ հոգևորականներ, ինչպես նաև մեծ թվով ուխտավորներ և զբոսաշրջիկներ։ Այս մասին հայտնում է «Ermenihaber.am»-ը։
Պատարագը նախատեսված է սկսել ժամը 11:00-ին և ավարտել 14:00-ին։ Նշենք, որ Աղթամարի Սուրբ Խաչ եկեղեցում պատարագների մատուցումը սկսվել է 95 տարվա դադարից հետո՝ 2010 թվականից։ Արարողությունները իրականացվում են բացառապես Թուրքիայի մշակույթի և զբոսաշրջության նախարարության հատուկ թույլտվությամբ։
Սուրբ Խաչ եկեղեցին կառուցվել է 915–921 թվականներին՝ Վասպուրականի թագավոր Գագիկ Արծրունու հրամանով։ 1113–1895 թթ․ այստեղ գործել է Աղթամարի առանձին կաթողիկոսարանը։ Դրա վերացումից հետո եկեղեցուն պատկանող վանքերն ու եկեղեցիները անցել էին Պոլսի հայոց պատրիարքարանին։ 1915 թվականի Հայոց ցեղասպանությունից հետո կղզին ու եկեղեցին լքվել են։ Տասնամյակներ շարունակ անխնամ վիճակում մնալուց հետո՝ 2005-ին Թուրքիայի մշակույթի և զբոսաշրջության նախարարությունը նախաձեռնել էր վանքի վերականգնումը։ Երկու տարի տևած աշխատանքների համար ծախսվել է շուրջ 4 միլիոն լիրա։ 2007 թվականին եկեղեցին բացվել էր այցելուների համար որպես թանգարան։ 2010-ից սկսած՝ ամեն տարի սեպտեմբերին Խաչվերաց տոնին հաջորդող կիրակի օրը Աղթամարի Սուրբ Խաչ եկեղեցում մատուցվում է պատարագ։
Հետևեք մեզ տելեգրամում
