Իրանի Ռաշտ քաղաքում մեկնարկել է Կասպից ծովի երկրների առափնյա նահանգների ղեկավարների հանդիպումը: Նիստի շրջանակներում ելույթ է ունեցել նաև ԻԻՀ ԱԳ նախարար Աբբաս Արաղչին, ով ընդգծել է Իրանի առաջնահերթությունները:
«Մեր հարևանները մեր առաջնահերթությունն են։ Սա Իրանի իսլամական հանրապետության արտաքին քաղաքականության հիմնարար սկզբունքն է։ Մենք ծրագրավորում և ջանքեր ենք գործադրում հարևանների հետ հարաբերությունների ընդլայնման և նրանց հետ քաղաքական, տնտեսական, սոցիալական, մշակութային և նույնիսկ անվտանգային մեծ հնարավորություններից օգտվելու համար։ Մեր արտաքին քաղաքականությունը կենտրոնացած է հենց այս ուղղությամբ»,-ասել է նախարարը:
Իրանի արտաքին գերատեսչության ղեկավարը նաև ընդգծել է Կասպից ծովի բոլոր երկրների հետ շատ լավ հարաբերությունները։
«Մենք բոլոր այդ երկրների հետ ստեղծել ենք շատ լավ, առանձին դեպքերում՝ ռազմավարական հարաբերություններ։ Իրանի և ՌԴ հարաբերությունները ռազմավարական գործընկերության բնույթ ունեն։ Պարոն Փեզեշքիանն այցելեց Ռուսաստան, ինչպես նաև շատ կարևոր այց ունեցավ Ադրբեջան, և կարծում եմ, որ առաջիկա մեկ ամսվա ընթացքում կայցելի նաև Ղազախստան և Թուրքմենստան։ Այս տարածաշրջանի երկրների առաջնորդների միջև հարաբերությունները շատ սերտ են և մեծ կարևորություն ունեն։ Կասպից ծովի տարածաշրջանը կարևոր է և՛ էներգետիկայի, և՛ միջանցքների ու տարանցիկ ճանապարհների տեսանկյունից։ Կասպից ծովի միջոցով այս տարածաշրջանի երկրների տնտեսական ու առևտրային համագործակցությունը ունի առանձնահատուկ նշանակություն բոլոր անդամ երկրների համար»,-եզրափակել է Արաղչին:
Հետևեք մեզ տելեգրամում
