Վրաստանի կառավարության աշխատակազմի ղեկավար Լևան Ժորժոլիանին ընդունել է ԱՄՆ Պետդեպարտամենտի ավագ խորհրդական Ջոնաթան Ասկոնասի գլխավորած պատվիրակությանը։
Վրացական կողմի հաղորդմամբ՝ Լևան Ժորժոլիանին նշել է, որ Վրաստանի կառավարությունը դժգոհ է ԱՄՆ-ի հետ հարաբերությունների ներկայիս մակարդակից և վերահաստատում է իր պատրաստակամությունը սկսել ռազմավարական գործընկերության վերականգնումը «մաքուր էջից»՝ կոնկրետ «ճանապարհային քարտեզով»։
Հանդիպմանն ուշադրություն է դարձվել Վրաստանի տարանցիկ և կապող գործառույթների ամրապնդման ուղղությամբ ձեռնարկված քայլերին։ Ժորժոլիանին ամերիկյան կողմին տեղեկացրել է երկաթուղային, ճանապարհային և նավահանգստային ենթակառուցվածքների զարգացման գործում կատարվող ներդրումների մասին։
Քննարկվել է նաև Վրաստանի դիրքորոշումը «Թրամփի երթուղու» վերաբերյալ։ Նշվել է, որ TRIPP-ը կարող է դրական ազդեցություն ունենալ տարածաշրջանի վրա՝ ԱՄՆ-ի կողմից բեռնափոխադրումների իրականացման համար անվտանգության երաշխիքների ստեղծման տեսանկյունից։
Հանդիպման ընթացքում նաև ընդգծվել է Վրաստանի դերը Հայաստանի և Ադրբեջանի միջև հարաբերությունների կարգավորման գործում։
Հետևեք մեզ տելեգրամում
