Իրանական Աստարա քաղաքում կայացել է Իրանի, Ադրբեջանի և Ռուսաստանի մաքսային ծառայությունների ղեկավարների տեղակալներ Էբրահիմ Նաղդիի, Ալեքսեյ Տիմոֆեյովի և Ֆուադ Մահմուդովի եռակողմ նիստը, հայտնում է իրանական ISNA լրատվական գործակալությունը:
Հանդիպման ընթացքում քննարկվել են երեք երկրների միջև տարանցման դյուրանցման, առևտրաշրջանառության ծավալների ավելացման հարցեր: Իրանական կողմն ընդգծել է ավելի շատ բեռնատարների անցում ապահովելու անհրաժեշտությունը: Հանդիպման ավարտին ստորագրվել է եռակողմ արձանագրություն:
Ըստ արձանագրության՝ ապրանքների տարանցումը սահուն դարձնելու, առևտրային փոխանակումների ծավալը մեծացնելու, մաքսազերծման ժամանակն ու ծախսերը զգալիորեն կրճատելու համար երեք երկրների մաքսային մարմինները ձեռնարկելու են գործնական միջոցառումներ։
Նկատենք, որ Հյուսիս-Հարավ միջանցքի արևմտյան ճյուղի զարգացման շրջանակներում Իրանի, Ադրբեջանի և ՌԴ տարբեր գերատեսչությունների եռակողմ հանդիպումներն ավելի հաճախ են դարձել:
Հետևեք մեզ տելեգրամում
