Ուկրաինայի նախագահ Վոլոդիմիր Զելենսկին ԱՄՆ-ում Ուկրաինայի դեսպան Օլգա Ստեֆանիշինային պաշտոնանկ անելուց հետո չի կարողանում թեկնածու ընտրել այդ պաշտոնում նշանակելու համար։ Այս մասին հայտնում է Politico պարբերականը՝ հղում անելով իր աղբյուրներին։
«Ուկրաինայի նախագահն ամեն կերպ փորձում է գտնել բավարար ազդեցություն ունեցող անձի, ով ի վիճակի կլինի ներկայացնել Կիևը Դոնալդ Թրամփի վարչակազմում, քանի որ հնարավոր թեկնածուները խուսափում են ստանձնել այս բարդ առաջադրանքը հակամարտության վճռորոշ փուլում»,- նշում է պարբերականը։
Ի սկզբանե Զելենսկին ծրագրել է դեսպանի պաշտոնում նշանակել նախկին փոխվարչապետ Յուլիա Սվիրիդենկոյին, սակայն վերջինս հրաժարվել է առաջարկից՝ «ձախողելով» Ուկրաինայի նախագահի ծրագրերը: Դրանից հետո մյուս հնարավոր թեկնածուները ևս զգուշավորություն են ցուցաբերել՝ չցանկանալով աշխատել Թրամփի «անանխատեսելի վարչակազմի» հետ։
Եվրոպական հարցերով նախկին փոխվարչապետ Իվաննա Կլիմպուշ-Ցինցաձեի խոսքով՝ համապատասխան հեղինակություն և որակավորում ունեցող ուկրաինացի գործիչները կասկածանքով են նայում այս հեռանկարին՝ անհանգստանալով, որ ստիպված կլինեն աշխատել անընդունելի պայմաններում։
Զելենսկին Ստեֆանիշինայի աշխատանքից ազատման հրամանագիրը ստորագրել էր օգոստոսի 3-ին՝ առանց պատճառ նշելու։ Ուկրաինական ԶԼՄ-ների փոխանցմամբ՝ դիվանագետն ազատման դիմում էր ներկայացրել «անձնական հանգամանքներից ելնելով»: Հետագայում հայտնի դարձավ, որ Ուկրաինայի Ազգային հակակոռուպցիոն բյուրոն և Մասնագիտացված հակակոռուպցիոն դատախազությունը նրան մեղադրանք են առաջադրել՝ չհստակեցնելով, թե հատկապես ինչում է մեղադրվում նախկին դեսպանը։
Հետևեք մեզ տելեգրամում
