Վրաստանի ենթակառուցվածքների նախարարության ճանապարհային դեպարտամենտը մինչև օգոստոսի 24-ը երկարաձգել է Վրաստան-Հայաստան և Վրաստան-Ադրբեջան հատվածներում նոր, չորս գոտի ունեցող մայրուղիներ կառուցելու միջազգային մրցույթը: Այս մասին հայտնում են վրացական ԶԼՄ-ները:
Մայրուղիների կառուցման մրցույթները հայտարարվել էին հուլիսի 7-ին և պետք է ավարտվեին օգոստոսի 14-ին, սակայն մրցույթի հայտերի ներկայացման վերջնաժամկետը երկարաձգվել է մինչև օգոստոսի 24-ը։
Նախագծի ընդհանուր արժեքը 250 միլիոն եվրո է, այն ֆինանսավորվում է Եվրոպական ներդրումային բանկի վարկով:
Նշենք, որ այժմ Վրաստան-Հայաստանը և Վրաստան-Ադրբեջանը կապող մայրուղիները երկգոտի են և հիմնականում անցնում են բնակեցված տարածքներով։ Նոր մայրուղին պետք է մեծացնի թողունակությունը և շրջանցի խիտ բնակեցված բնակավայրերը։
Ճանապարհի այս հատվածի մրցույթը հայտարարվել էր դեռևս 2024թ․ օգոստոսին, հաղթողը պարզ էր, շինարարությունը պետք է սկսվեր 2025թ-ին, սակայն մրցույթը պաշտոնապես չեղարկվել է 2026թ․ մարտին՝ ցածր մրցակցության պատճառով: 2026թ․ մարտին հայտարարվել էր 19 միլիոն եվրո արժողությամբ մրցույթ՝ ճանապարհաշինարարության վերահսկողության ծառայությունների համար: Միևնույն ժամանակ, Վրաստանի կառավարությունը շարունակել է ճանապարհի կառուցման համար անհրաժեշտ հողերի գնման գործընթացը, որի համար այս տարի հայտարարվել են մի քանի լրացուցիչ օտարումներ:
Նոր մայրուղիները կսկսվեն Ռուսթավի քաղաքից և կկառուցվեն Կարմիր Կամրջի (դեպի Ադրբեջան) և Սադախլոյի (դեպի Հայաստան) ուղղությամբ: Նախագծի համար հայտարարված մրցույթները նախատեսում են 61,3 կիլոմետր ընդհանուր երկարությամբ 4 գոտի ունեցող ճանապարհի կառուցում։
Հետևեք մեզ տելեգրամում
