Ադրբեջանի խորհրդարանը համաներում է շնորհում հայերի դեմ կռվածներին

Ադրբեջանի Միլլի Մեջլիսը (խորհրդարանը) կողմ է քվեարկել երկրում լայնածավալ համաներման մասին օրինագծի ընդունմանը: Երկրում համաներում հայտարարելու մասին ավելի վաղ հայտարարել էր Ադրբեջանի նախագահ Իլհամ Ալիևը։

Ակնկալվում է, որ այն կվերաբերի ավելի քան 20,000 դատապարտյալի, ինչը կլինի երկրի պատմության մեջ ամենամեծ համաներումը։

Ըստ համաներման մասին օրենքի նախագծի՝ այն նախատեսում է պատժից կամ քրեական պատասխանատվությունից ազատել նաև այն անձանց, ովքեր մասնակցել են Արցախի դեմ 2020 թ․ 44-օրյա պատերազմին և 2023թ․ սեպտեմբերի 19-20-ի ռազմական գործողություններին, ինչպես նաև այդ գործողությունների ընթացքում մահացած կամ անհետ կորած անձանց մերձավոր ազգականներին։ Բացի այդ, համաներումը կարող է տարածվել այն անձանց վրա, ովքեր հաշմանդամ են դարձել «Ադրբեջանի քաղաքացիական բնակչության դեմ Հայաստանի կողմից իրականացված ռազմական սադրանքների հետևանքով», ինչպես նաև կանանց, 60 տարեկանը լրացած անձանց և հանցագործության կատարման պահին անչափահաս անձանց վրա։

Նկատենք, որ Ադրբեջանում հայասպանության խրախուսման քաղաքականության շրջանակներում ավելի վաղ՝ դեկտեմբերի սկզբին բարձրացվել էր 2004 թվականին Հունգարիայում ՆԱՏՕ-ի «Գործընկերություն հանուն խաղաղության» ուսումնական ծրագրի շրջանակում հայ սպա Գուրգեն Մարգարյանին քնած ժամանակ կացնահարած Ռամիլ Սաֆարովի զինվորական կոչումը։ Փոխգնդապետ Սաֆարովին շնորհվել էր գնդապետի կոչում։