Սիրիայի կառավարական ուժերն ու քրդերի գլխավորած «Սիրիայի դեմոկրատական ուժերը» (SDF) Հալեպում հրադադար հաստատելու պայմանավորվածություն են ձեռք բերել։ Նախօրեին կողմերի միջև տեղի ունեցած բախումների հետևանքով զոհվել է երկու քաղաքացիական անձ, ևս մի քանիսը՝ վիրավորվել։ Regionmonitor-ի փոխանցմամբ՝ հայտնում է France 24-ը։
Լրատվամիջոցի տվյալներով՝ Սիրիայի բանակի գլխավոր հրամանատարությունը հրահանգ է տվել դադարեցնել SDF-ի կրակի աղբյուրների թիրախավորումը։ Իր հերթին, SDF-ը հայտարարել է, որ հրահանգել է դադարեցնել պատասխան գործողությունները։
Բախումները բռնկվել էին այն բանից հետո, երբ Թուրքիայի արտաքին գործերի նախարար Հաքան Ֆիդանը Դամասկոս կատարած այցի ընթացքում հայտարարել էր, որ SDF-ը, ըստ երևույթին, մտադիր չէ մինչև տարեվերջ համաձայնեցված ժամկետում ինտեգրվել Սիրիայի պետական զինված ուժերին։
Նշենք, որ 2025 թվականի մարտին SDF-ը և Սիրիայի ժամանակավոր կառավարությունը համաձայնություն էին ձեռք բերել մինչև տարեվերջ քրդական զինված ուժերը Սիրիայի բանակի կազմում ինտեգրելու շուրջ։ Թուրքիան SDF-ին ճանաչում է որպես ահաբեկչական կազմակերպություն և համարում է անմիջական սպառնալիք իր ազգային անվտանգությանը։ Այս համատեքստում Թուրքիան բազմիցս հայտարարել է, որ SDF-ի՝ Սիրիայի հյուսիսում ինքնուրույն զինված կառույցի պահպանման դեպքում կարող է դիմել ռազմական գործողությունների՝ կանխելու քրդական զինված խմբավորումների ամրապնդումը իր սահմանների մոտ։
Հետևեք մեզ տելեգրամում
