Հայաստանը նախատեսում է մինչև 2029 թվականը ամբողջությամբ իրականացնել Եվրամիության հետ վիզաների ազատականացման գործողությունների ծրագիրը։ Այս մասին սեպտեմբերի 28-ին ԵՄ Խորհրդի Արևելյան Եվրոպայի և Կենտրոնական Ասիայի հարցերով աշխատանքային խմբի պատվիրակության հետ հանդիպմանը հայտնել է ՆԳ նախարար Արփինե Սարգսյանը։
Սարգսյանը նշել է, որ գործընթացը Կառավարության առաջնահերթություններից է։ Նրա խոսքով՝ ծրագրի իրականացումը պետք է նպաստի ինչպես առանց վիզայի ռեժիմի ապահովմանը, այնպես էլ Հայաստանի ժողովրդավարական ինստիտուտների ամրապնդմանը։
Վիզաների ազատականացման գործողությունների ծրագրի շրջանակում Հայաստանը նախատեսում է նոյեմբերի 1-ից գործարկել նոր կենսաչափական համակարգ։ Այն ներառում է նոր կենսաչափական անձնագրերի և նույնականացման քարտերի տրամադրում, ինչպես նաև համապատասխան ենթակառուցվածքների և տվյալների ստուգման մեխանիզմների ներդրում։
Սարգսյանը հանդիպման ընթացքում անդրադարձել է նաև սահմանների կառավարման և միգրացիայի ոլորտներում նախատեսվող բարեփոխումներին։ Նրա խոսքով՝ մշակվում է սահմանների համալիր կառավարման ռազմավարություն, որը նախատեսվում է Կառավարության հաստատմանը ներկայացնել մինչև տարեվերջ։
Հետևեք մեզ տելեգրամում
