Ադրբեջանում ապօրինի պահվող Վագիֆ Խաչատրյանը ծանր վիճակում հոսպիտալացվել է

Ադրբեջանում ապօրինի պահվող Վագիֆ Խաչատրյանը հոսպիտալացվել է։ Ադրբեջանի արդարադատության նախարարությունը տեղի ԶԼՄ-ներին հայտնել է, որ 70-ամյա Խաչատրյանը (ծնված՝ 1955թ.) 2025 թվականի դեկտեմբերի 22-ին սկսել է իրեն վատ զգալ։ Նրա մոտ նկատվել է շնչառության դժվարացում և սրտի հատվածում ցավեր։

Հիշեցնենք, որ Բաքվի զինվորական դատարանը 2023թ-ին 15 տարվա ազատազրկման է դատապարտել ՀՀ քաղաքացի Վագիֆ Խաչատրյանին։ Նախատեսվում է, որ 15 տարվա ազատազրկման 5 տարին Խաչատրյանը կանցկացնի բանտում, իսկ մնացած ժամկետը՝ խիստ ռեժիմով ուղղիչ հիմնարկում։

Նա առաջին բուժօգնություն է ստացել Արդարադատության նախարարության գլխավոր բժշկական վարչության բժշկական մասում, որից հետո շտապ տեղափոխվել է Արդարադատության նախարարության բժշկական հաստատություն։ Այնտեղ իրականացվել են ինտենսիվ թերապիա, բայց քանի որ նրա վիճակի էական բարելավում չի նկատվել, նա տեղափոխվել է համապատասխան պետական ​​բուժհաստատություն։

Նրա վիճակը գնահատվում է ծանր։