Երևանում օդի որակն այս պահին բարելավվել է, տեղացած ձյունը մաքրել է օդը, սակայն գլոբալ առումով օդի աղտոտվածության հարցը բարդ լուծվող խնդիր է, բայց քաղաքապետարանից վստահեցնում են՝ ամեն ինչ անելու են՝ մեղմելու խնդիրը: Այդ մասին ասուլիսում հայտնել է Երևանի քաղաքապետ Տիգրան Ավինյանը:
«Դեռևս 2023-ի նախընտրական ծրագրում արձանագրել էինք, որ մեր առաջնային խնդիրն է Երևան քաղաքում տեղադրել բավարար քանակի օդի որակի չափիչ սարքեր: Եվ այդ նախընտրական մեր խոստումն իրականացրել ենք ամբողջությամբ»,-ասաց քաղաքապետը:
Նա վստահեցրեց, որ Երևան քաղաքում այս պահի դրությամբ պոտենցիալ աղտոտվող վայրերում՝ մասնավորապես 4-րդ կարգի ռիսկայնության կառուցապատման օբյեկտներում տեղադրված են երկուական օդի որակի չափիչ սարքեր, որոնք միացված են քաղաքապետարանի ընդհանուր համակարգին: Քաղաքապետը վստահեցրեց, որ իրապես ականջալուր են գործընկերներին, որոնք հայտնում են մասնագիտական կարծիք՝ օդի որակի հետ կապված:
Ավինյանը նկատեց՝ օդի որակի խնդիրը վերաբերում է ոչ միայն Երևանին, այլ ամբողջ Արարատյան գոգավորությանը:
«Հիմնական խնդիրը պայմանավորված է մեր բնակլիմայական պայմաններով: Հիմա օդի որակը շատ լավ մակարդակում է, որովհետև հյուսիսային ցիկլոնը, ձյունը ամբողջապես մաքրել է օդը»,-ասաց Ավինյանը:
Նա նկատեց, որ այս խնդիրը նոր չէ: Այս խնդրի մասին խոսել են դեռևս 80-ական թվականներից և հիմնականում նույն ժամանակահատվածի մասին՝ նոյեմբեր-մարտ: «Այս խնդիրը շատ բարդ լուծվող խնդիր է: Բայց, ամեն դեպքում, որոշակի մեղմացումներ հնարավոր է ունենալ: Եվ մենք այդ ուղղությամբ ունենք քառամյա օդի որակի բարելավման ծրագիր, որը մանրամասն նկարագրում է այն բոլոր գործողությունները, որ Երևանի քաղաքապետարանը լոկալ մակարդակում իրականացնելու է, որ խնդիրը մեղմի»,-վստահեցրեց քաղաքապետը:
Հետևեք մեզ տելեգրամում
