Միլիարդատեր Իլոն Մասկը վերադառնում է քաղաքականություն և պատրաստ է ֆինանսավորել հանրապետականների քարոզարշավը 2026 թվականի միջանկյալ ընտրություններում։ Այս մասին հաղորդում է The Wall Street Journal-ը։
Հրապարակման համաձայն՝ «աշխարհի ամենահարուստ մարդն արդեն 10 միլիոն դոլար է նվիրաբերել հանրապետական Սենատի թեկնածուին, իսկ նրա լարված հարաբերությունները ԱՄՆ նախագահ Դոնալդ Թրամփի հետ սկսել են շտկվել»։ Հաղորդագրության մեջ նշվում է, որ վերջին շաբաթներին Մասկի քաղաքական թիմը հանդիպումներ է ունեցել պոտենցիալ կապալառուների հետ՝ թվային նախագծերի և հաղորդագրությունների վրա աշխատելու համար։
Թերթի տվյալներով՝ Մասկը 2024 թվականին մոտ 300 միլիոն դոլար է ծախսել Թրամփին և հանրապետականներին աջակցելու համար՝ դառնալով ԱՄՆ-ի ամենամեծ հանրային քաղաքական դոնորը։
2025 թվականին Մասկը ԱՄՆ կառավարության արդյունավետության դեպարտամենտի (DOGE) համակարգողն էր և հատուկ նշանակված աշխատակիցը։ Նա, ըստ էության, Թրամփի մերձավոր շրջապատի անդամ էր։ Սակայն, ըստ ամերիկյան լրատվամիջոցների հաղորդագրությունների, նախագահի և գործարարի միջև հարաբերությունները սկսել են վատթարանալ մի շարք պատճառներով, այդ թվում՝ Մասկի բիզնես շահերի հետ կապված։
Հետևեք մեզ տելեգրամում
