Հայաստանից արտահանումը նվազել է

Հայաստանից արտահանման ծավալները 2025 թվականի 11 ամսում՝ հունվար-նոյեմբերին, նվազել են 40.6 տոկոսով, Հայաստանից արտահանման ծավալներով շարունակել են առաջատար մնալ Ռուսաստանը, Արաբական Միացյալ Էմիրություններն ու Չինաստանը:  

Հայաստանի արտաքին առևտրաշրջանառությունը 2025 թվականի հունվար-նոյեմբերին կազմել է 18 մլրդ 908 մլն 366.3 հազար դոլար՝ 2024-ի նույն ժամանակահատվածի նկատմամբ նվազելով 33.2 տոկոսով:

Ընդ որում, արտահանումը նվազել է 40.6 տոկոսով՝ կազմելով 7 մլրդ 349 մլն 13.6 հազար դոլար, իսկ ներմուծումը նվազել է 27.4 տոկոսով՝ կազմելով 11 մլրդ 559 մլն 352.7 հազար դոլար:

Հայաստանը 11 ամսում ամենաշատն արտահանել է Ռուսաստան՝ 2 մլրդ 725 մլն 215.9 հազար դոլարի, թեև 2024-ի նույն ժամանակահատվածի նկատմամբ ցուցանիշը նվազել է 9 տոկոսով: Հայաստանից արտահանման ծավալներով երկրորդ տեղում  Արաբական Միացյալ Էմիրություններն է. 11 ամսում Հայաստանն ԱՄԷ իրականացրել  է 1 մլրդ 698 մլն 159 հազար դոլարի արտահանում, թեև 2024-ի 11 ամսվա նկատմամբ Էմիրություններ արտահանումը նվազել է 66.2 տոկոսով: Երրորդ տեղում Չինաստանն է՝ արտահանման 648 մլն 541.7 հազար դոլար ծավալով, 2024-ի նույն ժամանակահատվածի նկատմամբ այն նվազել է 38.1 տոկոսով:

Ինչ վերաբերում է ԵԱՏՄ և ԵՄ երկրներ արտահանմանը, ապա դեպի ԵԱՏՄ երկրներ արտահանումը նվազել է 7.2 տոկոսով՝ կազմելով 2 մլրդ 948 մլն 125.5 հազար դոլար: ԵՄ երկրներ արտահանումն աճել է 7.6 տոկոսով՝ կազմելով 593 մլն 641.6 հազար դոլար:

Մասնավորապես Հայաստանը Նիդեռլանդներ է արտահանել 127 մլն 536.6 հազար դոլարի ապրանք, 2024-ի 11 ամսվա նկատմամբ աճը 11.4 տոկոս է: Գերմանիա արտահանումն աճել է 74.3 տոկոսով՝ կազմելով 101 մլն 620.8 հազար դոլար: Բելգիա արտահանումն աճել է 15.9 տոկոսով՝ կազմելով 127 մլն 121.2 հազար դոլար: Իսկ Ֆրանսիա արտահանումը նվազել է 29.5 տոկոսով՝ կազմելով 5 մլն 895.2 հազար դոլար: Իտալիա արտահանումը նվազել է 1.3 տոկոսով՝ կազմելով 60 մլն 428.5 հազար դոլար:  

ՀՀ վիճակագրական կոմիտե