Իրանի նախագահ Մասուդ Փեզեշքիանը կարգադրել է հրապարակել երկրում վերջին շաբաթներին տեղի ունեցող ցույցերի ու անկարգությունների ժամանակ զոհվածների անունները։ Ինչպես հաղորդում է «Mehr» լրատվական գործակալությունը, այս մասին հայտարարել է նախագահի վարչակազմի հասարակայնության հետ կապերի բաժնի ղեկավար Մոհամմադ Մեհդի Թաբաթաբեին:
Նա հայտնել է, որ նախագահի կարգադրությամբ ցույցերի ու անկարգությունների ժամանակ զոհվածների անունները կհրապարակվեն։
Թաբաթաբեին նշել է, որ այս քայլը պատասխանն է վիճակագրությունը նենգափոխելու՝ արևմտյան զանգվածային լրատվամիջոցների փորձերին: «Նպատակն է մերկացնել յուրաքանչյուրին, ով ստում է», – հավելել է նա:
Իրանի արտաքին գործերի նախարար Աբբաս Արաղչին հունվարի 23-ին հայտնել է, որ զոհերի թիվը հասել է 3117-ի, նրանց թվում կան ինչպես քաղաքացիական զոհեր, այնպես էլ անվտանգության ուժերի աշխատակիցներ:
Հետևեք մեզ տելեգրամում
