ԱՄՆ-ը, Ուկրաինան և եվրոպական մի շարք երկրներ համաձայնեցրել են բազմաստիճան գործողությունների ծրագիր, որը նախատեսված է ապագա խաղաղ համաձայնագրի պահպանման և դրա հնարավոր խախտումների դեպքում արագ արձագանք ապահովելու համար։ Այս մասին հայտնում է Financial Times-ը՝ հղում անելով իր աղբյուրներին։
Ըստ հրապարակման՝ ծրագիրը նախատեսում է, որ Ռուսաստանի կողմից խաղաղ համաձայնագրի շարունակական խախտումների դեպքում ԱՄՆ-ն և եվրոպական երկրները կկիրառեն համակարգված արձագանք, որը կարող է ներառել նաև ռազմական բնույթի քայլեր։
Աղբյուրների փոխանցմամբ՝ արձագանքման մեխանիզմը նախատեսում է 24 ժամվա ընթացքում միջոցառումների մեկնարկ՝ սկսած դիվանագիտական նախազգուշացումից և Ուկրաինայի զինված ուժերի պատասխան գործողություններից։ Եթե ռազմական գործողությունները չդադարեցվեն, ապա կգործարկվի ծրագրի երկրորդ փուլը, որը ենթադրում է այսպես կոչված «ցանկացողների կոալիցիայի» միջամտություն։
Ըստ Financial Times-ի՝ մշակված սխեման նպատակ ունի ապահովել հնարավոր խաղաղ համաձայնագրի կենսունակությունը և կանխել դրա միակողմանի խախտումները։
Հետևեք մեզ տելեգրամում
