«Amazon»-ի արտադրած, Մելանյա Թրամփի մասին պատմող վավերագրական ֆիլմը, գերազանցել է տոմսարկղային կանխատեսումները և գրանցել վերջին տասնամյակի լավագույն մեկնարկը վավերագրական ժանրում՝ ԱՄՆ կինոթատրոններում ցուցադրման առաջին հանգստյան օրերին հավաքելով 7 միլիոն դոլար։ Սակայն ֆիլմի արտադրության և առաջխաղացման ծախսերը զգալիորեն գերազանցել են վավերագրական ֆիլմերին բնորոշ միջին ցուցանիշները․ դրա ստեղծման վրա ծախսվել է շուրջ 40 միլիոն դոլար, իսկ գովազդային արշավի վրա՝ ևս 35 միլիոն դոլար։
Միևնույն ժամանակ, «Amazon»-ը, որը վերջերս կրճատել է 16,000 աշխատատեղ, ենթարկվել է քննադատության։ Շատերի կարծիքով՝ Առաջին տիկնոջ մասին վավերագրական ֆիլմ նկարահանելը և դրա համար նման աստղաբաշխական գումար վճարելը ոչ այլ ինչ է, քան նրա ամուսնու՝ Դոնալդ Թրամփի երկրորդ նախագահության ժամանակ վերջինիս բարեհաճությունը շահելու փորձ։
Ֆիլմը, որը ներկայացնում է Մելանյա Թրամփի կյանքը Սպիտակ տուն վերադառնալու նախապատրաստական փուլում՝ 2025 թվականի սկզբին, տոմսերի վաճառքով զիջել է երկու սարսափ ժանրի ֆիլմերի՝ «Iron Lung»-ին և Ռեյչել ՄաքԱդամսի մասնակցությամբ «Send Help»-ին։ Այդուհանդերձ, այն կարողացել է գերազանցել «Shelter» մարտաֆիլմի ցուցանիշները։
«Deadline»-ի փոխանցմամբ՝ «Մելանյա» ֆիլմի առաջին ցուցադրության հանգստյան օրերի կանխատեսվող եկամուտը շուրջ 5 միլիոն դոլար էր։ Լրատվամիջոցների գնահատմամբ՝ ֆիլմը առավել հաջողություն է գրանցել ԱՄՆ հարավային նահանգներում պահպանողական լսարանի շրջանում, հատկապես 55 տարեկանից բարձր կանանց մոտ, որոնք կազմել են բացման օրվա հանդիսատեսի շուրջ 72 տոկոսը։ Ֆիլմի առաջխաղացման ռազմավարությունը, ըստ դիտարկումների, կենտրոնացել է այն թեմաների վրա, որոնք մոտ են Դոնալդ Թրամփի կողմնակիցների հետաքրքրություններին՝ հայրենասիրություն, քրիստոնեություն և ընտանիքի կարևորություն։
Հետևեք մեզ տելեգրամում
