Պոլսո Հայոց պատրիարք Սահակ Մաշալյանը Վիեննայում կայացած եպիսկոպոսական հավաքին հանդես է եկել ուղերձով, որտեղ անդրադարձել է Հայ առաքելական եկեղեցու շուրջ ստեղծված իրավիճակին և առաջարկել լուծումներ՝ ճգնաժամը հաղթահարելու համար։
Պատրիարքը նշել է, որ շուրջ մեկ տարի է, ինչ Հայաստանի իշխանությունների և Մայր Աթոռ Սուրբ Էջմիածնի միջև առկա լարվածությունը մտահոգություն է առաջացրել ողջ հայ աշխարհում։ Նրա խոսքով՝ ստեղծված իրավիճակը հանգեցրել է եկեղեցու ներսում հակասությունների խորացման, իսկ որոշ եկեղեցականներ հանդես են եկել ընդդիմադիր դիրքորոշմամբ, ինչը ավելի է բարդացրել ընդհանուր իրավիճակը։
Սահակ Մաշալյանը նաև նշել է, որ ներկայիս պայմաններում Մայր Աթոռի Գերագույն հոգևոր խորհուրդը, իր գնահատմամբ, հեղինակազրկվել է, և հապճեպ ու լարված պայմաններում ընդունված որոշումները նպաստել են հակամարտության խորացմանը։ Նրա կարծիքով՝ նման իրավիճակը կարող է բացասաբար անդրադառնալ նաև Ամենայն Հայոց կաթողիկոս Գարեգին Բ-ի հեղինակության վրա, եթե չիրականացվեն անհրաժեշտ բարեփոխումներ։
Սահակ Բ-ն ընդգծել է, որ այս պայմաններում անհրաժեշտ է ամրապնդել Մայր Աթոռի կառավարման համակարգը և աջակցել Ամենայն Հայոց կաթողիկոս Գարեգին Բ-ին։
Որպես առաջին քայլ՝ նա առաջարկել է ստեղծել խորհուրդ (սինոդ)՝ կազմված ավագ եպիսկոպոսներից, որը կօգնի Կաթողիկոսին եկեղեցու կառավարման հարցերում և կնպաստի ճգնաժամի հաղթահարմանը։ Նրա խոսքով՝ նման կառույցը կարող է նաև նպաստել իշխանությունների հետ երկխոսությանը և իրավիճակի կայունացմանը։
Պատրիարքը նաև առաջարկել է հնարավորինս շուտ սահմանել Ազգային եկեղեցական ժողովի գումարման հստակ ժամկետ և ձևավորել դրա կազմակերպման հանձնախումբ։ Նա նշել է, որ այդ ժողովը կարող է կարևոր դեր ունենալ եկեղեցու ներսում առաջացած խնդիրների կարգավորման և լարվածության նվազեցման գործում։
Հետևեք մեզ տելեգրամում
