Թուրքիայում խորանում է ժողովրդագրական ճգնաժամը․ բնակչության ծերացումը սպառնում է տնտեսությանը

Թուրքիան կանգնած է լուրջ ժողովրդագրական ճգնաժամի առաջ․ «երիտասարդ և դինամիկ երկրի» փուլը աստիճանաբար ավարտվում է՝ զիջելով բնակչության արագ ծերացման միտմանը։ Ըստ Թուրքիայի վիճակագրական ծառայության (TÜİK) տվյալների՝ վերջին հինգ տարում 65 տարեկանից բարձր քաղաքացիների թիվն աճել է 20.3%-ով՝ հասնելով 9.7 միլիոնի, իսկ նրանց բաժինը ընդհանուր բնակչության մեջ առաջին անգամ գերազանցել է 11%-ը։

Կանխատեսումների համաձայն՝ մինչև 2080 թվականը տարեցների թիվը կարող է հասնել 25.5%-ի, իսկ դարի վերջում՝ մինչև 33%։ Ծերացման ինդեքսը վերջին տասնամյակում կրկնապատկվել է․ եթե 2014 թվականին յուրաքանչյուր 100 երեխայի և երիտասարդի բաժին էր ընկնում 35 տարեց, ապա 2025-ին՝ արդեն 71.2։ Միաժամանակ միայնակ ապրող տարեցների թիվը հասել է 1.3 միլիոնի։

«Yeni Şafak»-ի վերլուծաբան Օզգյուր Սոյլուն այս իրավիճակը բնութագրում է որպես «ժողովրդագրական փակուղի»՝ ընդգծելով, որ այն պահանջում է տնտեսության և սոցիալական համակարգերի խորքային վերակազմավորում։ Այս ֆոնին ըստ հեղինակի սոցիալ-տնտեսական խնդիրները ևս սրվում են․ հարցումների համաձայն՝ Թուրքիայի բնակչության մոտ 70%-ը դժգոհ է կենսամակարդակից, ընդամենը 29%-ն է առանց դժվարության գնում սնունդ, իսկ 45.7%-ը նախատեսում է վարկ վերցնել տոներին ծախսերը հոգալու համար։