Մերձավոր Արևելքում շարունակվող հակամարտության հետևանքով վերջին 23 օրում ավելի քան 2,100 երեխա է զոհվել կամ վիրավորվել, հայտնում է UNICEF-ը։ Նշվում է, որ այդ թվում տուժածներ կան նաև Լիբանանում և Քուվեյթում, իսկ թվերը շարունակում են աճել։
UNICEF-ի փոխտնօրեն Թեդ Չայբանի խոսքով՝ պատերազմի սկզբից ի վեր օրական միջինը շուրջ 87 երեխա է զոհվում կամ վիրավորվում։ Նրա գնահատմամբ՝ տարածաշրջանի երեխաները վճարում են ամենածանր գինը, և հակամարտության հետագա ընդլայնումը կարող է աղետալի հետևանքներ ունենալ միլիոնավորների համար։
Նա կոչ է արել անհապաղ դադարեցնել ռազմական գործողությունները, ապահովել քաղաքացիական բնակչության պաշտպանությունը և երաշխավորել մարդասիրական օգնության անարգել հասանելիությունը։
Միաժամանակ, ՅՈՒՆԵՍԿՕ-ն զգուշացնում է, որ բռնությունների շարունակումը կհանգեցնի կրթական խորացող ճգնաժամի՝ հատկապես խոցելի երեխաների շրջանում, ինչպես նաև ուսուցիչների կորստի և կրթական համակարգի թուլացման։
ՄԱԿ-ի UNOPS գործակալությունը նշում է, որ հակամարտությունը արդեն ազդում է համաշխարհային տնտեսության վրա՝ նպաստելով նավթի, վառելիքի և գազի գների աճին։ Տրանսպորտային և մատակարարման շղթաների խափանումները վտանգում են առաջին անհրաժեշտության ապրանքների և դեղերի հասանելիությունը։
Հետևեք մեզ տելեգրամում
