Իրանի արտգործնախարար Աբբաս Արաղչին Al Jazeera-ին տված հարցազրույցում հայտարարել է, որ պատերազմի ավարտը պետք է լինի համապարփակ և ներառի ողջ տարածաշրջանը՝ Լիբանանը, Իրաքը և Եմենը: Նա հստակեցրել է, որ այս պահին որևէ բանակցություն նախատեսված չէ, և տեղի է ունենում միայն ուղերձների փոխանակում:
Հարցին, թե արդյոք երկիրը պատրաստ է վեցամսյա պատերազմի, նախարարը պատասխանել է, որ Իրանը պատրաստ է առնվազն վեց ամիս և ավելի տևողությամբ դիմակայության: Նա նաև կասկած է հայտնել, որ ԱՄՆ-ն ցամաքային գործողության համարձակություն կունենա:
Միջազգային երաշխիքների վերաբերյալ նախարարը հայտնել է իր թերահավատությունը՝ նշելով, որ նույնիսկ ՄԱԿ-ի Անվտանգության խորհրդի երաշխիքները բավարար չեն Իրանի համար: Նա ընդգծել է, որ թեև բարեկամ երկրների կողմից առաջարկվել են տարբեր գաղափարներ, Թեհրանը դեռևս ուսումնասիրում է դրանք՝ հասկանալու համար, թե որոնք կարող են իրապես արդյունավետ լինել Իրանի պայմաններով պատերազմի դադարեցման դեպքում: Նա նաև կտրուկ մերժել է ցանկացած վերջնագիր՝ հորդորելով ԱՄՆ նախագահին փոխել իր մոտեցումը և Իրանի հետ խոսել միայն հարգանքի լեզվով:
Անդրադառնալով ռազմավարական նշանակություն ունեցող Հորմուզի նեղուցին՝ Արաղչին պարզաբանել է, որ այն գտնվում է Իրանի և Օմանի ներքին ջրերում, այլ ոչ թե միջազգային տարածքում: Ըստ նախարարի՝ նեղուցը փակ է միայն այն երկրների նավերի համար, որոնք պատերազմի մեջ են Իրանի հետ: Արաղչին հավելել է, որ նեղուցի անվտանգության և բնապահպանական հարցերի կառավարումը պետք է իրականացվի բացառապես ափամերձ երկրների՝ Իրանի և Օմանի համատեղ մեխանիզմների միջոցով:
Հետևեք մեզ տելեգրամում
