Իսրայելի վարչապետ Բենիամին Նեթանյահուի գրասենյակը աջակցություն է հայտնել Իրանի դեմ հարվածները դադարեցնելու ԱՄՆ-ի որոշմանը, սակայն հայտարարել է, որ երկշաբաթյա հրադադարը չի տարածվի Լիբանանում Իսրայելի շարունակվող ռազմական գործողությունների վրա:
Վարչապետի գրասենյակը նշել է նաև, որ Իրանի դեմ գործողությունները կդադարեցնի, եթե Թեհրանն անհապաղ բացի Հորմուզի նեղուցը և դադարեցնի հարձակումները Միացյալ Նահանգների, Իսրայելի և տարածաշրջանի երկրների դեմ։
Նեթանյահուի հայտարարությունը հաջորդել է Պակիստանի վարչապետ Շեհբազ Շարիֆի հայտարարությանը, ըստ որի՝ ԱՄՆ-ը, Իրանը և նրանց դաշնակիցները «պայմանավորվել են անհապաղ հրադադարի շուրջ ամենուր, ներառյալ Լիբանանը և այլուր»։ Շարիֆն ասել էր, որ այդ քայլն «ուժի մեջ է մտնում անմիջապես»։
Առայժմ «Հեզբոլլահի» կամ Լիբանանի կառավարության կողմից Նեթանյահուի հայտարարության վերաբերյալ որևէ մեկնաբանություն չի եղել: Լիբանանի ազգային լրատվական գործակալությունն էլ հայտնել է, որ իսրայելական զինվորականները շարունակում են հարձակումներ իրականացնել երկրի հարավային շրջանների վրա։ Չորեքշաբթի առավոտյան իսրայելական ուժերը ռմբակոծել են Տյուրոսի հարավում գտնվող Սրիֆա քաղաքը, ինչպես նաև Սադիքինում գտնվող մի մեքենա, ինչի հետևանքով մի քանի մարդ վիրավորվել է:
Լիբանանն Իրանի դեմ ԱՄՆ-ի և Իսրայելի պատերազմի մեջ ներքաշվել է մարտի 2-ին՝ այն բանից հետո, երբ Թեհրանի դաշնակից «Հեզբոլլահը» հարձակումներ սկսեց Իսրայելի վրա:«Հեզբոլլահը» հայտարարել է, որ հարձակումները պատասխան էին պատերազմի առաջին օրը՝ փետրվարի 28-ին, Իսրայելի կողմից Իրանի գերագույն առաջնորդ այաթոլլա Ալի Խամենեիի սպանությանը։ Իսրայելական բանակն իր հերթին ներխուժել է հարավային Լիբանան և հայտարարել, որ նպատակ ունի զավթել ավելի շատ տարածքներ՝ այսպես կոչված բուֆերային գոտի ստեղծելու համար:
Ըստ Լիբանանի իշխանությունների՝ մարտի 2-ից ի վեր Լիբանանի վրա իսրայելական հարձակումների հետևանքով զոհվել է ավելի քան 1500 մարդ, իսկ ավելի քան 1,2 միլիոնը տեղահանվել են։
Հետևեք մեզ տելեգրամում
