ԱՄՆ նախագահ Դոնալդ Թրամփը խիստ կերպով քննադատել է Հռոմի պապ Լեո XIV-ին՝ նրան անվանելով «թույլ» հանցավորության դեմ պայքարում և «սարսափելի» արտաքին քաղաքականության մեջ։ Այս մասին հայտնում է «Al Jazeera»-ն։
Թրամփը նման հայտարարությամբ հանդես է եկել «Truth Social» սոցիալական հարթակում կատարած գրառմամբ՝ արձագանքելով պապի վերջին հայտարարություններին, որոնք վերաբերում էին Իրանի շուրջ զարգացումներին և պատերազմական իրավիճակին։
Պապ Լեոն, որը պատմության մեջ առաջին պապն է, ով ունի ամերիկյան ծագում, վերջին շաբաթներին բազմիցս քննադատել է ԱՄՆ-ի և Իսրայելի գործողությունները Իրանի դեմ՝ կոչ անելով դադարեցնել արյունահեղությունը և անցնել բանակցությունների։ Նա նաև Թրամփի՝ Իրանի նկատմամբ հնչեցրած կոշտ սպառնալիքները բնորոշել է որպես «ամբողջությամբ անընդունելի»։
Ի պատասխան՝ Թրամփը հայտարարել է․ «Ես չեմ ցանկանում պապ, որը կարծում է, թե Իրանը կարող է ունենալ միջուկային զենք։ ․․․ Եվ չեմ ցանկանում այնպիսի պապ, որը քննադատում է ԱՄՆ նախագահի գործողությունները»։
Նա նաև նշել է, որ Հռոմի պապը պետք է «կենտրոնանա լավ պապ լինելու վրա, ոչ թե զբաղվի քաղաքականությամբ» և ընդգծել է, որ «նա լավ չի կատարում իր աշխատանքը»։
Ավելի ուշ լրագրողների հետ զրույցում Թրամփը կրկնել է իր քննադատությունը՝ հավելելով, որ պապի «մեծ երկրպագուն չէ»։
Երկու առաջնորդների միջև լարվածությունը սրվել է նաև ԱՄՆ վարած ներգաղթի քաղաքականության պատճառով, որի վերաբերյալ ևս պապը հանդես է եկել քննադատական դիրքորոշմամբ։
Հետևեք մեզ տելեգրամում
