Ապրիլի 17-ի կեսգիշերին Իսրայելի և Լիբանանի միջև հրադադար է հաստատվել: Այդ մասին հայտարարել է ԱՄՆ նախագահ Դոնալդ Թրամփը: Թեև նախնական ժամկետը սահմանված է տասը օր, Միացյալ Նահանգները հույս է հայտնել, որ այն կարող է երկարաձգվել՝ դառնալով հիմք տարածաշրջանում տևական կայունության համար։ Փոխանցում է BBC-ին:
Իսրայելի վարչապետ Բենիամին Նեթանյահուն այս քայլն անվանել է «պատմական» հնարավորություն Լիբանանի հետ խաղաղության համաձայնագրի հասնելու համար, իսկ Լիբանանի նախագահ Ժոզեֆ Աունը ողջունել է գործընթացը։ Այդուհանդերձ, իրավիճակը մնում է փխրուն, քանի որ մինչև հրադադարի մեկնարկը «Հեզբոլլահն» ու իսրայելական ուժերը շարունակել են ակտիվ հարվածներ փոխանակել։
Համաձայնագրի պայմանների շուրջ կողմերի միջև առկա են լուրջ տարաձայնություններ, որոնք կարող են վտանգել գործընթացը։ «Հեզբոլլահը» համաձայնել է պահպանել հրադադարը միայն այն դեպքում, եթե դադարեցվեն հարձակումները Լիբանանի ողջ տարածքում և իսրայելական ուժերին չտրվի տեղաշարժի ազատություն։ Մինչդեռ Նեթանյահուն հայտարարել է, որ իսրայելական զորքերը կշարունակեն մնալ հարավային Լիբանանի 10 կիլոմետրանոց «անվտանգության գոտում», ինչն ուղղակիորեն հակասում է լիբանանյան կողմի պահանջներին։ ԱՄՆ պետքարտուղարությունն իր հերթին շեշտում է, որ Լիբանանի կառավարությունը պետք է գործուն քայլեր ձեռնարկի «Հեզբոլլահի» հարձակումները կանխելու համար՝ ընդգծելով, որ երկրի ինքնիշխանության և պաշտպանության բացառիկ պատասխանատվությունը կրում են Լիբանանի անվտանգության ուժերը։
Իրանական կողմը ևս արձագանքել է հրադադարի հաստատմանը: Խորհրդարանի խոսնակ Մոհամմադ Բաղեր Ղալիբաֆը նշել է, որ Լիբանանը հանդիսանում է Իրանի և ԱՄՆ-ի միջև Պակիստանի միջնորդությամբ ձեռք բերված հրադադարի պայմանավորվածության անբաժանելի մասը։ Ըստ Թեհրանի՝ համապարփակ հրադադարի հաստատումը հակամարտության բոլոր գոտիներում առանցքային նշանակություն ունի տարածաշրջանային խաղաղության համար։
Հետևեք մեզ տելեգրամում
