Արցախի նախկին պետնախարար Ռուբեն Վարդանյանը ուղերձ է հղել ՀՀ մարդու իրավունքների պաշտպան Անահիտ Մանասյանին՝ անդրադառնալով Ադրբեջանում պահվող հայ գերիների վիճակին և առաջարկելով մի շարք քայլեր։ Ուղերձը փոխանցվել է ընտանիքի հետ ունեցած հեռախոսազրույցի ընթացքում։
Վարդանյանը կոչ է արել ՄԻՊ-ին դիտարկել Բաքու այցելելու հնարավորությունը՝ ընդգծելով, որ մինչ այժմ տնտեսական և այլ հարցերով Բաքու այցելած ՀՀ պատվիրակությունների ներկայացուցիչներից որևէ մեկը չի հանդիպել հայ գերիներին։ Նա նաև նշել է, որ իր կինը՝ Վերոնիկա Զոնաբենդը, պատրաստ է մասնակցել նման նախաձեռնությանը։
Ուղերձում Վարդանյանը տեղեկացրել է, որ հանդիպել է Ադրբեջանի օմբուդսմեն Սաբինա Ալիևայի հետ և բարձրացրել հայ բանտարկյալների պահման պայմաններին վերաբերող մի շարք հարցեր՝ այդ թվում կենցաղային, բժշկական, իրավական և մարդասիրական խնդիրները։ Նրա խոսքով՝ ադրբեջանական կողմը պատրաստակամություն է հայտնել աջակցել Բաքու այցի կազմակերպմանը, սակայն այն դեռ չի իրականացվել։
Վարդանյանը նաև նշել է, որ հայ գերիները երկար ժամանակ պահվում են ադրբեջանական բանտերում՝ առանց ընտանիքների հետ հանդիպումների և միջազգային կառույցների, այդ թվում՝ Կարմիր խաչի միջազգային կոմիտեի, անկախ մոնիթորինգի։
Նա կարևորել է Հայաստանի և Ադրբեջանի օմբուդսմենների միջև համակարգված աշխատանքի անհրաժեշտությունը՝ ընդգծելով, որ դրա բացակայությունը սահմանափակում է մարդասիրական հարցերի լուծման հնարավորությունները։
Ուղերձի վերջում Վարդանյանը ՄԻՊ-ին ուղղել է մի շարք հարցեր՝ կապված Բաքու հնարավոր այցի, ադրբեջանական կողմի հետ համագործակցության և մինչ այժմ ձեռնարկված քայլերի վերաբերյալ՝ ընդգծելով հայ գերիների իրավունքների պաշտպանության ուղղությամբ անհապաղ և հետևողական գործողությունների անհրաժեշտությունը։
Հետևեք մեզ տելեգրամում
