Թուրքիայի նախագահ Ռեջեփ Թայիփ Էրդողանը հանդես է եկել Թուրքիայի հայ համայնքին ուղղված ավանդական ապրիլքսանչորսյան ցավակցական ուղերձով, որն ընթերցվել է հայկական Սբ Հակոբ եկեղեցում Հայոց ցեղասպանության սուրբ նահատակներին նվիրված պատարագի ընթացքում։ Այս մասին հայտնել է «ԱԿՕՍ»-ը։
Ուղերձում Էրդողանը հիշատակել է Առաջին համաշխարհային պատերազմի տարիներին կյանքից զրկված օսմանցի հայերին և ցավակցություն հայտնել նրանց սերունդներին․ «Կայսրության փլուզման ընթացքում օկուպացիաների, բախումների, ապստամբությունների, հրոսակների գործողությունների, հիվանդությունների պատճառով օսմանցի ժողովուրդները մեծ ցավ են ապրել»,- նշել է Թուրքիայի նախագահը՝ հավելելով, որ իրենք կարողացել են ստեղծել Թուրքիայի Հանրապետությունը՝ չմոռանալով այդ ցավերը, բայց նաև կարողանալով հաղթահարել դրանք։
Էրդողանի ուղերձում տեղ են գտել հետևյալ ձևակերպումները․
«Մենք ջանում ենք ապագա սերունդներին թողնել ոչ թե վատ հիշողություններ, այլ ապագա, որտեղ ճշմարտությունները փոխանցվում են խղճի լեզվով։
Պատմությունից թշնամանք քաղել փորձողներին լավագույն պատասխանը տալիս ենք այն մոտեցմամբ, որը չի սահմանափակվում գաղափարական կաղապարներով, գերադասում է խաղաղության, ապրումակցման և երկխոսության լեզուն, և հիմքում դնում է ոչ թե բախումը, այլ փոխհամաձայնությունը։
86 միլիոնով միասին կկառուցենք մեր ապագան և այն ժառանգությունը, որը թողնելու ենք մեր սերունդներին։
Այս մտքերով կրկին կիսում եմ հայկական համայնքի անցյալում ունեցած ցավերը և մեկ անգամ ևս հարգանքով հիշում եմ կյանքը կորցրած բոլոր օսմանյան քաղաքացիներին»։
Հետևեք մեզ տելեգրամում
