«Ի՞նչ եղավ Օսմանյան կայսրության 3 միլիոն քրիստոնյաների հետ, ու՞ր գնացին». ելույթ Թուրքիայի խորհրդարանում

Թուրքիայի խորհրդարանում նախօրեին կայացած նիստի ժամանակ «Ժողովուրդների հավասարություն և ժողովրդավարություն» (DEM) կուսակցության Մարդինի պատգամավոր Ջորջ Ասլանը անդրադառնալով Հայոց ցեղասպանության թեմային, ասել է հետևյալը․
«1915 թվականին Օսմանյան կայսրության բնակչությունը կազմում էր 13 միլիոն, որոնցից 3 միլիոնը հայեր, ասորիներ և այլ քրիստոնյա ժողովուրդներ էին։ Հիմա 2026 թվականն է․ եթե նրանց թիվը բնականորեն աճեր, այն պետք է միլիոններ կազմեր, սակայն այժմ ընդամենը 50 հազար է։ Ի՞նչ եղավ այդ մարդկանց հետ, ինչո՞ւ նրանց թիվը չաճեց, ո՞ւր գնացին»։

Նշենք, որ «Ժողովուրդների հավասարություն և ժողովրդավարություն» (DEM) կուսակցության կենտրոնական գործադիր խորհուրդը ապրիլի 24-ին՝ Հայոց ցեղասպանության 111-րդ տարելիցի կապակցությամբ հանդես է եկել հայտարարությամբ, որում 1915 թվականի իրադարձությունները որակել է որպես էթնիկ, կրոնական և մշակութային ցեղասպանություն։

Կուսակցությունն ընդգծել էր, որ պատմական փաստերի հետ առերեսվելը, զոհ դարձած ժողովուրդներից ներողություն խնդրելը և վերականգնողական արդարադատության միջոցներին դիմելը անխուսափելի քայլեր են համատեղ ու հավասար ապագա կառուցելու ճանապարհին։

Հայտարարության մեջ նշվում էր, որ միատարր հասարակություն ստեղծելու և տարբեր ինքնություններն ու մշակույթները ջնջելու մտայնությունը պատմական մոլորություն է եղել, որի համար հայերն ու այլ քրիստոնյա ժողովուրդները ծանր գին են վճարել։ Հայտարարությունն ավարտվում էր հայ և մյուս քրիստոնյա ժողովուրդների 111-ամյա ցավն ու սուգը կիսելու և բոլոր զոհերի հիշատակը հարգանքով ոգեկոչելու ուղերձով։