Իսրայելի վարչապետ Բենյամին Նեթանյահուն հայտարարել է, որ հույս ունի առաջիկա տարիների ընթացքում աստիճանաբար նվազեցնել, իսկ երկարաժամկետ հեռանկարում՝ դադարեցնել ԱՄՆ-ից ստացվող ռազմական ֆինանսական աջակցությունը, միաժամանակ խորացնելով հարաբերությունները Ծոցի արաբական երկրների հետ։
Նեթանյահուն CBS-ին տված հարցազրույցում նշել է․ «Նպատակ ունենք ամերիկյան ֆինանսական աջակցությունը հասցնել զրոյի»։ Նրա խոսքով՝ ԱՄՆ-ն ներկայում տարեկան շուրջ 3.8 միլիարդ դոլարի ռազմական օգնություն է տրամադրում Իսրայելին, իսկ 2018-2028 թվականների համար Վաշինգտոնը հաստատել է ընդհանուր 38 միլիարդ դոլարի աջակցության փաթեթ։ Այդուհանդերձ, Իսրայելի վարչապետը ընդգծել է, որ եկել է ժամանակը վերանայելու ԱՄՆ-Իսրայել ֆինանսական համագործակցության ձևաչափը՝ այն բնութագրելով որպես «ճիշտ պահ» նման փոփոխությունների համար։
Հարցազրույցի ընթացքում նա չի անդրադարձել Իրանի դեմ հնարավոր ռազմական գործողությունների ժամկետներին կամ ծրագրերին, սակայն խոսել է Իրանում հնարավոր իշխանափոխության սցենարների մասին։ Հարցին, թե արդյոք հնարավոր է տապալել Իրանի ներկայիս իշխանությունը, Նեթանյահուն պատասխանել է. «Հնարավո՞ր է՝ այո։ Երաշխավորված է՝ ոչ»։
Հետևեք մեզ տելեգրամում
