Ռուսաստանի արտաքին գործերի նախարարության ԱՊՀ երկրների չորրորդ դեպարտամենտի տնօրեն Միխայիլ Կալուգինը հայտարարել է, որ Երևանի՝ ԵՄ-ի հետ մերձեցման քաղաքականությունը կարող է հանգեցնել ռուս-հայկական հարաբերությունների համակարգային փոփոխությունների։ Այդ մասին նա ասել է ռուսական «ՏԱՍՍ» գործակալությանը տված հարցազրույցում։
Կալուգինի խոսքով՝ Մոսկվան տարբեր մակարդակներով ազդակներ է փոխանցում Հայաստանի ղեկավարությանը և հասարակությանը, որ Եվրամիության հետ մերձեցումը կարող է ազդեցություն ունենալ Հայաստանի և Ռուսաստանի հարաբերությունների վրա։
«Պարզ ասած՝ երկու աթոռի վրա նստել չի ստացվի»,- նշել է ռուս դիվանագետը՝ անդրադառնալով Հայաստանի՝ միաժամանակ ԵԱՏՄ-ում անդամակցությունն ու ԵՄ-ի հետ ինտեգրման գործընթացները շարունակելու քաղաքականությանը։
Կալուգինը նաև քննադատել է Երևանում անցկացված Եվրոպական քաղաքական համայնքի և Հայաստան-ԵՄ գագաթնաժողովները՝ նշելով, որ ԵՄ-ի խոստացած 2,5 միլիարդ եվրոյի ներդրումները մինչ այժմ չեն իրականացվել։ Նրա խոսքով՝ եվրոպական կողմը «վաճառում է այն, ինչ գոյություն չունի»։
Ռուս դիվանագետը անդրադարձել է նաև Մեծամորի ատոմակայանի թեմային՝ նշելով, որ Հայաստան-ԵՄ համատեղ հայտարարությունում ընդգծվել է ատոմակայանի շահագործումից դուրսբերման ուղղությամբ համագործակցության կարևորությունը, ինչը, ըստ նրա, կարող է ազդել Հայաստանի էներգետիկ անվտանգության վրա։
Կալուգինը նաև դժգոհություն է հայտնել Ուկրաինայի նախագահ Վլադիմիր Զելենսկու՝ Երևան այցից և նրա «հակառուսական հայտարարություններից»՝ պնդելով, որ հայկական կողմը դրանք անտեսել է։
Նա ընդգծել է նաև, որ Հարավային Կովկասը կենսական նշանակություն ունի Ռուսաստանի համար։ Կալուգինի խոսքով՝ Մոսկվան տարածաշրջանը դիտարկում է որպես իր ռազմավարական շահերի կարևոր ուղղություն և շարունակելու է ակտիվ դերակատարություն ունենալ այնտեղ ընթացող քաղաքական ու տնտեսական գործընթացներում։
Հետևեք մեզ տելեգրամում
