ԱՄՆ նախագահ Դոնալդ Թրամփը հայտարարել է, որ եթե Իրանը չընդունի պատերազմի ավարտի և իր միջուկային ծրագրի կարգավորման վերաբերյալ Վաշինգտոնի պայմանները, ապա Միացյալ Նահանգները «կավարտի սկսածը»։ Այս մասին հայտնել է «The Times of Israel»-ը։
«Նրանք կա՛մ ճիշտ որոշում կընդունեն, կա՛մ մենք կավարտենք մեր սկսածը», – ասել է Թրամփը Չինաստան մեկնելուց առաջ:
Թրամփը հերքել է այն պնդումները, թե ԱՄՆ-ում աճող գներն իրեն ստիպել են ձգտել պատերազմի ավարտին․ «Ես չեմ մտածում ամերիկացիների ֆինանսական վիճակի մասին, ամենակարևորն այն է, որ Իրանը չպետք է ունենա միջուկային զենք»,- ասել է նա։
Պեկինում Սի Ծինպինի հետ հանդիպումներից առաջ Թրամփը նշել է, որ չի կարծում, թե իրեն անհրաժեշտ կլինի Չինաստանի օգնությունը Իրանի հետ հակամարտությունը լուծելու համար։ Նրա խոսքով՝ Իրանը շարունակում է խոչընդոտել ծովային երթևեկությանը, որով իրականացվում է համաշխարհային նավթի մատակարարումների մոտ մեկ հինգերորդը։
«Չեմ կարծում, թե Իրանի հարցում մեզ օգնություն է պետք։ Մենք կհաղթենք՝ խաղաղ ճանապարհով, թե այլ կերպ: Ինչ ձևով էլ նայեք, մենք հաղթում ենք։ Մենք քննարկելու շատ հարցեր ունենք։ Անկեղծ ասած, չէի ասի, որ Իրանը դրանցից մեկն է, որովհետև մենք Իրանը լիովին վերահսկում ենք: Կա՛մ համաձայնագիր կլինի, կա՛մ նրանք կոչնչացվեն»,- ասել է նա։
Հիշեցնենք, որ Իրանի գլխավոր բանակցողը երեքշաբթի հայտարարել էր, որ Վաշինգտոնը պետք է ընդունի Թեհրանի խաղաղության ծրագիրը, հակառակ դեպքում ձախողման կբախվի։ Այս հայտարարությունը հնչել էր այն բանից հետո, երբ Թրամփը երկուշաբթի զգուշացրել էր, որ հրադադարը փլուզման եզրին է։
Իրանի ԱԳՆ-ն հայտնել է, որ իր պատասխանը ներառում էր պատերազմի ավարտ բոլոր ճակատներում, այդ թվում՝ Լիբանանում, Իրանի նավահանգիստների նկատմամբ ԱՄՆ ռազմածովային շրջափակման դադարեցում և արտերկրում սառեցված իրանական ակտիվների ազատում։ Սակայն, Թրամփը խիստ քննադատել էր Թեհրանի պատասխանը՝ այն անվանելով «լիովին անընդունելի»։ Նա հայտարարել էր, որ Միացյալ Նահանգները «ամբողջական հաղթանակ» կունենա Իրանի նկատմամբ, և որ ավելի քան մեկ ամիս մարտերը դադարեցրած հրադադարը կանգնած է փլուզման եզրին։
Ի պատասխան՝ ԻՀՊԿ-ն հայտարարել էր, որ Թեհրանում զորավարժություններ է անցկացրել՝ «ամերիկա-սիոնիստական թշնամու ցանկացած շարժին դիմակայելու մարտունակությունը բարձրացնելու» նպատակով։ Իրանի պաշտպանության նախարարության խոսնակը հայտարարել էր, որ եթե ԱՄՆ-ն «դիվանագիտական հարթակում չընդունի իրանական ժողովրդի արդար և վերջնական պահանջները, ապա պետք է սպասի ռազմական դաշտում իր պարտությունների կրկնությանը»։
Հետևեք մեզ տելեգրամում
