Մայիսի 17-ին Մոսկվայում և Մերձմոսկովյան շրջանում Ուկրաինայի իրականացրած դրոնային հարվածների հետևանքով զոհվել է առնվազն չորս մարդ, հայտնում են տեղական իշխանությունները։
Ռուսական կողմի տվյալներով՝ երեք մարդ զոհվել է Մոսկվայի շրջանում, ևս մեկը՝ Բելգորոդի մարզում՝ Ուկրաինայի հետ սահմանին։ Իշխանությունների հայտարարությունների համաձայն՝ սա վերջին մեկ տարվա ընթացքում Մոսկվայի ուղղությամբ իրականացված ամենամասշտաբային դրոնային հարձակումն է։ Ռուսաստանի պաշտպանության նախարարությունը հայտարարել է, որ վերջին 24 ժամում երկրի տարբեր շրջաններում խոցվել է ավելի քան 1000 ուկրաինական անօդաչու թռչող սարք։ Մոսկվայի քաղաքապետ Սերգեյ Սոբյանինը նշել է, որ միայն Մոսկվայի ուղղությամբ խոցվել է 81 դրոն։
Մոսկվայի մարզի իշխանությունները հայտնել են նաև վիրավորների մասին։ Ըստ նրանց՝ հարձակման հետևանքով վնասվել են մի շարք բնակելի շենքեր և ենթակառուցվածքներ, իսկ որոշ շրջաններում իրականացվել են տարհանումներ։
Նշենք, որ Ուկրաինայի նախագահ Վլադիմիր Զելենսկին, իր հերթին, հայտարարել է, որ նման գործողությունները պատասխան են ռուսական շարունակվող հարվածներին։ Նա նշել է, որ Ուկրաինան կարողանում է հարվածել մինչև 500 կմ խորության թիրախների։ Ուկրաինայի զինված ուժերը նաև հայտարարել են, որ հարվածներ են հասցվել Ռուսաստանի տարածքում գտնվող մի շարք օբյեկտների, այդ թվում՝ ռազմական նշանակության ենթակառուցվածքների։
Ռուսաստանի արտգործնախարարությունը հարձակումը որակել է որպես «ահաբեկչական գործողություն»՝ պնդելով, որ այն ուղղված է եղել քաղաքացիական բնակչության դեմ։ Ռուսական կողմը, սակայն, չի հաղորդել ռազմավարական օբյեկտների լուրջ վնասների մասին։
Հետևեք մեզ տելեգրամում
