Հայաստանում ռուսական գազից բացի այլընտրանքային մատակարարումներ չեն լինի, իսկ շուկայական գնի պարագայում իրավիճակը կարող է զգալիորեն բարդանալ։ Այս մասին «Վեստի» հեռուստածրագրի եթերում հայտարարել է Ռուսաստանի փոխվարչապետ Ալեքսեյ Օվերչուկը; «Մենք շատ լավ գիտենք իրավիճակը գազի շուկայում։ Այնտեղ այլ գազ բացի ռուսաստանյանից երբեք չի լինի։ Ամբողջ հարցը միայն այն է՝ որտեղից Հայաստանը կստանա ռուսաստանյան գազը և ինչ միջնորդների կվճարի», – ասել է նա։
Օվերչուկի խոսքով՝ հնարավոր զարգացումների դեպքում Հայաստանը կարող է հայտնվել բարդ իրավիճակում։ «Հայաստանում կլինի շատ բարդ իրավիճակ։ Իսկ մենք դա չենք ուզում», – նշել է ՌԴ փոխվարչապետը։ Նա նաև ընդգծել է, որ Եվրոպան դեռևս շարունակում է ստանալ ռուսական գազ՝ հավելելով, որ անհրաժեշտ է պարզապես նայել գործող ենթակառուցվածքներին և խողովակաշարերի քարտեզին։
Հիշեցնենք՝ Ռուսաստանը Հայաստանին գազ է մատակարարում հազար խորանարդ մետրի դիմաց մոտ 177 դոլարով, մինչդեռ Եվրոպայում գինը շուրջ 600 դոլար է։ Վերջին շրջանում ռուս բարձրաստիճան պաշտոնյաները պարբերաբար ընդգծում են, որ Հայաստանի հնարավոր եվրոպական ինտեգրման դեպքում գազի գինը կարող է բարձրանալ, մինչդեռ Երևանը հայտարարում է, որ ԵԱՏՄ-ից դուրս գալու մտադրություն չունի։
Հետևեք մեզ տելեգրամում
