Իսլամական հեղափոխության պահապանների կորպուսը (ԻՀՊԿ) հայտարարություն է տարածել Հորմուզի նեղուցի շրջանում իրավիճակի կտրուկ էսկալացիայի և ԱՄՆ ռազմական օբյեկտներին հասցված պատասխան հարվածների վերաբերյալ:
ԻՀՊԿ հայտարարության համաձայն՝ անցած գիշեր ամերիկյան ուժերը Հորմուզի նեղուցի մերձակայքում հարվածել են իրանական նավթակրին, ինչին ի պատասխան՝ ԻՀՊԿ ռազմածովային ուժերը հրթիռակոծել են «Պանայա» նավը, որն, ըստ Թեհրանի, պատկանում է «ամերիկա-իսրայելական հակառակորդին»:
Միջադեպից հետո ամերիկյան կողմը թիրախավորել է Ղեշմ կղզու հարավում գտնվող ԻՀՊԿ կապի աշտարակը: «Ի պատասխան՝ ԻՀՊԿ օդատիեզերական ուժերը, հրթիռների և անօդաչու թռչող սարքերի կիրառմամբ, հարձակում են իրականացրել տարածաշրջանի երկրներից մեկում տեղակայված ամերիկյան ռազմաօդային և ուղղաթիռային բազայի, ինչպես նաև ԱՄՆ 5-րդ նավատորմի կենտրոնակայանի ուղղությամբ»,- նշվել է հայտարարությունում:
ԱՄՆ Կենտրոնական հրամանատարությունը (CENTCOM) պաշտոնապես հաստատել է հարձակումը՝ հստակեցնելով, որ Իրանը մի քանի բալիստիկ հրթիռներ է արձակել Քուվեյթում և Բահրեյնում տեղակայված ամերիկյան ռազմաբազաների ուղղությամբ:
Հիշեցնենք, որ չնայած Իրանի ու ԱՄՆ-ի միջև հաստատված հրադադարին՝ կողմերը ժամանակ առ ժամանակ փոխադարձ հարվածներ են հասցնում միմյանց:
Հետևեք մեզ տելեգրամում
