«Human Rights Watch» (HRW) միջազգային իրավապաշտպան կազմակերպությունը հանդես է եկել զեկույցով, որում Ադրբեջանի իշխանություններին մեղադրում է արտասահմանում բնակվող ընդդիմադիրներին ու քննադատներին հեռակա կարգով հետապնդելու և դատապարտելու մեջ։
Ըստ իրավապաշտպանների՝ Բաքուն քրեական գործեր է հարուցում սոցիալական ցանցերում արված հրապարակումների կամ առցանց մեկնաբանությունների հիման վրա, ինչի հետևանքով արտագաղթած ակտիվիստները դատապարտվում են երկարամյա ազատազրկման։ Սա մեծացնում է նրանց արտահանձնման, ճամփորդությունների ժամանակ ձերբակալվելու և անդրազգային ճնշումների ենթարկվելու ռիսկերը։
Կազմակերպությունն ուսումնասիրել է Բաքվի ծանր հանցագործությունների դատարանի կողմից կայացված ութ հեռակա դատավճիռներ, որոնցով Եվրոպայում և ԱՄՆ-ում բնակվող ադրբեջանցիները դատապարտվել են 6-ից մինչև 16 տարվա բանտարկության։ Այս դատավարությունները հիմնվել են բացառապես պետության նշանակած փորձագետների եզրակացությունների վրա, իսկ պետական պաշտպանները որևէ կապ չեն հաստատել ամբաստանյալների հետ և չեն ապահովել իրական պաշտպանություն։
Զեկույցում որպես օրինակ նշվում է Ֆրանսիայում բնակվող պատմաբան Ալթայ Գյոյուշովի գործը: Նա 2020 թվականի յութուբյան եթերի և ֆեյսբուքյան գրառումների համար հեռակա դատապարտվել է 6 տարվա ազատազրկման՝ իշխանությունը բռնությամբ զավթելու կոչերի մեղադրանքով։ Նույն օրը նմանատիպ մեղադրանքով 8 տարվա բանտարկության է դատապարտվել Նյու Յորքում բնակվող քաղաքական վերլուծաբան Արաստուն Օրուջլուն։
Իրավապաշտպաններն ընդգծում են, որ այս պրակտիկան հնարավոր է դարձել 2023 թվականի դեկտեմբերին Ադրբեջանի քրեական դատավարության օրենսգրքում կատարված փոփոխությունների արդյունքում, որոնք երկրում առաջին անգամ ներդրեցին հեռակա քրեական վարույթի ինստիտուտը։
«Human Rights Watch-ը» կոչ է անում Ադրբեջանի իշխանություններին անհապաղ վերանայել և չեղարկել խոսքի ազատության հետ կապված բոլոր հեռակա դատավճիռները, իսկ եվրոպական կառավարություններին՝ խիստ վերահսկողության տակ առնել Բաքվից ստացվող արտահանձնման հարցումները և թույլ չտալ, որ այդ դատավճիռները դառնան անդրազգային ճնշումների գործիք։
Հետևեք մեզ տելեգրամում
