Ադրբեջանն ու Իրանը համաձայնության են եկել Արաքս գետի ջրային պաշարների բաշխման շուրջ

Հունիսի 8-ից 11-ը Իրանի Իսլամական Հանրապետությունում տեղի է ունեցել Արաքս գետի ջրային և էներգետիկ ռեսուրսների օգտագործման հարցերով Ադրբեջանի և Իրանի Իսլամական Հանրապետության մշտական ​​համատեղ հանձնաժողովի 55-րդ նիստը։

Նիստը վարել են Ադրբեջանի ջրային ռեսուրսների պետական ​​գործակալության ներքո գործող Տարածաշրջանային ջրային վերականգնման ծառայության խորհրդի նախագահ Զաքիր Գուլիևը և Իրանի էներգետիկայի նախարարության սահմանային գետերի գլխավոր վարչության ղեկավար Ֆարիբա Ավերիդեն։

Ադրբեջանական ԶԼՄ-ները հայտնում են, որ հանդիպման ընթացքում մշակվել և հաստատվել են երկու երկրների միջև Արաքս գետի ջրային ռեսուրսների բաշխման, շահագործման ռեժիմները։ Բացի այդ, քննարկվել են գետից ջրառի մոնիթորինգի, ջրի որակի վերահսկողության, գետի վրա նոր ջրաչափական սարքերի տեղադրման և փոխադարձ համագործակցության այլ հարցեր։

Քննարկումներից հետո կողմերը ստորագրել են ամփոփիչ արձանագրություն, որը ներառում է առաջիկա համատեղ աշխատանքները։