Հայոց ցեղասպանության զոհերի հուշահամալիրում մեկնարկել են բարեկարգման երկրորդ փուլի աշխատանքները։ ԿԳՄՍ նախարարության փոխանցմամբ՝ աշխատանքներին ծանոթանալու նպատակով հուշահամալիր է այցելել ՀՀ կրթության, գիտության, մշակույթի և սպորտի նախարար Ժաննա Անդրեասյանը։
Նախարարին ուղեկցել են նախարարության գլխավոր քարտուղար Հասմիկ Հակոբյանը և Ցեղասպանության թանգարան-ինստիտուտի տնօրենի ժամանակավոր պաշտոնակատար Հրաչյա Թասչյանը։
Ժաննա Անդրեասյանը հեղինակային խմբի և կապալառու կազմակերպության ներկայացուցիչների հետ շրջել է շինհրապարակում, ծանոթացել իրականացվող աշխատանքների ընթացքին և կարևորել դրանց բարձրորակ ու սահմանված ժամկետներում իրականացումը։
Բարեկարգման երկրորդ փուլով նախատեսվում է հիմնանորոգել Հավերժության տաճարի ևս երեք մույթ, ինչպես նաև սկսել թանգարանային հատվածի նորոգման աշխատանքները։ Ծրագրի շրջանակում իրականացվող շինարարական աշխատանքների ամբողջական ավարտը նախատեսվում է մինչև տարեվերջ։
Նախարարությունից տեղեկացրել են, որ աշխատանքների ընթացքում հուշահամալիրը շարունակելու է գործել և բաց կլինի այցելուների համար։
Հիշեցնենք, որ ծրագրի առաջին փուլն ավարտվել էր ապրիլին։ Այդ ընթացքում հիմնանորոգվել էին հուշահամալիրի կենտրոնական, արևմտյան և արևելյան հատվածները, ինչպես նաև Հավերժության տաճարի մի շարք մույթեր։ Կառուցվել էր նոր ջրահեռացման համակարգ, իրականացվել էին ջրամեկուսացման և ամրակայման աշխատանքներ, փոխարինվել էին մի շարք սալեր և տեղադրվել նոր սալահատակ։ Բացի այդ, հուշապատի երկայնքով կառուցվել էր նոր ճեմուղի, բարեկարգվել էին կանաչապատ տարածքները և հիմնանորոգվել ոռոգման ցանցը։
Ծրագիրը նպատակ ունի ապահովել Հայոց ցեղասպանության զոհերի հիշատակին նվիրված հուշահամալիրի պահպանությունն ու բարեկարգված տեսքը՝ համապատասխանեցնելով այն ժամանակակից պահպանական պահանջներին։
Հետևեք մեզ տելեգրամում
