TRIPP նախագծի իրականացումը գտնվում է ակտիվ աշխատանքային փուլում, և դրա կյանքի կոչման ճանապարհին քաղաքական կամ ֆինանսական խոչընդոտներ չկան։ Այս մասին, «Արմենպրես»-ի փոխանցմամբ, լրագրողների հետ ճեպազրույցում հայտարարել է ՀՀ վարչապետ Նիկոլ Փաշինյանը։
«Կա շարունակական աշխատանքային գործընթաց։ Եթե ոչ ամենօրյա, ապա առնվազն ամենշաբաթյա կտրվածքով քննարկվում են ինժեներական, նախագծային, ֆինանսական և լոգիստիկ հարցեր։ Այսինքն՝ գործընթացը գնում է առաջ, և եթե տեխնիկական խնդիրները չխանգարեն, այս տարի ցանկանում ենք արդեն գետնի վրա տեսնել շինարարական աշխատանքներ», – նշել է վարչապետը։
Փաշինյանի խոսքով՝ ծրագրի շուրջ աշխատանքները շարունակվում են տարբեր ուղղություններով, և ներգրավված կողմերը համակարգված կերպով զբաղվում են դրա գործնական իրականացման նախապատրաստությամբ։
Անդրադառնալով հայ-ամերիկյան համագործակցությանը՝ վարչապետը տեղեկացրել է, որ մոտ ապագայում նախատեսվում է վավերացնել երկկողմ կարևոր փաստաթուղթը, ինչից հետո հնարավոր կլինի անցնել դրա գործնական իրականացման փուլին։
Հետևեք մեզ տելեգրամում
